ITP ekonomıkalyq aımaǵyna qatysýshy 23 jańa kompanııa 1,2 mlrd teńge ınvestıtsııa saldy
ASTANA. QazAqparat - 2016 jyly «Innovatsııalyq tehnologııalyr parki» Arnaıy ekonomıkalyq aımaǵynyń basqarýshy uıymy «Innovatsııalyq tehnologııalar parki» derbes klasterlik qory AEA-ny damytýǵa baǵyttalǵan jumystar atqardy, dep habarlaıdy QR Investıtsııalar jáne damý mınıstrliginiń baspasóz qyzmeti.
Bıyl «ITP» AEA-ny damytý men nasıhattaý aıasynda otandyq jáne sheteldik kompanııalardyń, memlekettik qurylymdardyń qatysýymen 54 is-shara uıymdastyryldy. Tájirıbe almasý baǵdarlamasynyń aıasynda «ITP» AEA mamandarynyń birneshe arnaıy ekonomıkalyq aımaqtarynyń qyzmetimen tanysýy qamtamasyz etildi: Ońtústik Qazaqstanda ornalasqan «Ońtústik» AEA, Almaty oblysyndaǵy «Qorǵas - Shyǵys qaqpasy» AEA jáne Qaraǵandy oblysynda ornalasqan «Saryarqa» AEA.
Arnaıy ekonomıkalyq aımaǵynyń aıasynda jumys atqaratyn kompanııalardy tartý «ITP» AEA-ny damytýdyń negizgi baǵyttarynyń biri bolyp tabylady. Aǵymdaǵy jyldyń ishinde «ITP» AEA-nyń rezıdenttigin alý boıynsha 127 konsýltatsııa ótkizildi. Nátıjesinde 23 jańa rezıdent tartyldy. Bul «EPAM Kazakhstan» JShS, «Kazteleport» AQ, Kúndelik (Kundelik) JShS», «Regıonalnye platejnye sıstemy» JShS, «Digital Management» JShS sııaqty kompanııalar. Tartylǵan 23 jańa rezıdenttiń ortaq ınvestıtsııa kólemi 1 236 372 725 teńgeni quraıdy. Olardyń ortaq qyzmetkerler sany - 611.
Jańa kompanııalardy tartýmen birge «ITP» AEA rezıdentteriniń sapalyq quramyn kóterýge baǵyttalǵan jumys josparly túrde atqarylýda. Bıyl «ITP» AEA rezıdenti retinde málimdelgen jobalaryn júzege asyrmaǵan 15 kompanııamen kelisim shart buzyldy.
2016 jyldyń 27 jeltoqsanyndaǵy málimetter boıynsha 164 kompanııa «ITP» AEA-nyń rezıdenti bolyp tabylady. Olardyń basty bóligi óz jumysyn aqparattyq tehnologııalar salasynda atqarady. 68 kompanııa eksaýmaqtylyq qaǵıdasy boıynsha jumys isteıdi. «ITP» AEA-nyń barlyq rezıdentteriniń ortaq jumys oryndarynyń sany - 3706.
Sonymen qatar, «ITP» AEA-nyń ınfraqurylymyn damytý jumystary josparly túrde iske asyrylyp otyr. 2016 jyly «ITP» AEA-nyń ekinshi kezeginde «Tecata» brendimen jumys atqaratyn «DS Multimedia CA» óndiristik nysany paıdalanýǵa berildi. Jýyq arada «ITP» AEA-nyń ekinshi kezegimen salynatyn birqatar nysandar tapsyrylady. Olardyń ishinde 9 myń sharshy metr kólemindegi zamanǵa saı jabdyqtalǵan jumys oryndary, sondaı-aq, ındýstrııalyq jáne áleýmettik ınfraqurylymmen jabdyqtalǵan ǵımarattar. KBTU Drilling Center kesheniniń birinshi kezeńi jáne Qazaqstan teńiz akademııasy jospar boıynsha salynýda. Oǵan qosa, ınnovatsııalyq kompanııalardy jumys orny men sońǵy tehnologııalyq jabdyqtarmen (Jańa materıaldar jáne addıtıvti tehnologııalar, Indýstrııa 4.0, Internet of things, Smart tehnologııalar) qamtamasyz etetin Almaty Tech Garden Lab arnaıy ortalyǵy aıaqtalýǵa jaqyn. «ITP» AEA ekinshi kezeńindegi ınfraqurylymdarynyń 85-90% daıyn.
Innovatsııalyq tehnologııalar parkiniń negizinde qurylatyn Tehnologııalardy damytý ortalyqtary Qazaqstandyq jáne sheteldik kompanııalardy tartýǵa eleýli yqpal etedi. Atalǵan ortalyqtardy «ITP» DKQ úzdik transulttyq kompanııalarmen birge qurady. Jaqyn ýaqytta McKinsey&Company kompanııasymen birlesip qurylatyn Taý-ken- metallýrgııalyq kesheniniń Quzyretter ortalyǵynyń birinshi modýli iske qosylady. Sonymen birge, geologııa salasyndaǵy strategııalyq máselelerdi sheshý maqsatymen «ITP» AEA-nyń terrıtorııasynda Geologııalyq klaster qurý josparlanǵan.
Atalmysh sharalardyń iske asyrylýy tehnologııalyq kompanııalardy tartýǵa odan ári tartymdy jaǵdaı jasap, qazirigi rezıdentterdiń ishki jáne syrtqy naryqtardaǵy básekelestik qabiletterin kóterýge oń yqpal etedi.
