Itke baýyr basyp qalamyz – kınolog
QYZYLORDA. KAZINFORM – Nurymjan Dúısenbekov Qyzylorda oblystyq qylmystyq atqarý júıesi departamentine qarasty №68 mekemeniń rejım jáne kúzet bóliminde baqylaýshy-kınolog bolyp eńbek etip júr. Kazinform tilshisimen áńgime barysynda ol kınolog mamandyǵynyń ereksheligi týraly aıtyp berdi.
Keıipkerimiz bala kúninen ıtke jaqyn. Kınologııaǵa qyzyǵýshylyǵyn týdyrǵan da – osy qasıeti. Sóıtip, 2021 jyly Mańǵystaý oblysynyń Beıneý aýdanynda shekara qyzmetinde aǵa baqylaýshy-kınolog bolyp eńbek jolyn bastady.
- Sol kezde kúshikterdiń ishinen malınýa tuqymdy belgııalyq ovcharkany tańdap aldym. Jańa kúshikpen birge Almaty qalasynyń Qaraoı aýdanyndaǵy kınologııalyq ortalyqta tórt aılyq akademııalyq oqý-jattyǵýdan óttim. Qyzmettik ıtti iz kesý baǵytyna baýlyp, ózim de kásibı mashyqtardy meńgerdim. Oqýdy aıaqtaǵan soń qaıtadan shekara qyzmetine oralyp, úsh jyl boıy shekara buzýshylardy ustaý jáne qaýipsizdikti qamtamasyz etýge úles qostym. Bul kezeń kásibı turǵydan ósýime, jaýapkershilik pen tózimdiliktiń shynaıy baǵasyn sezinýge múmkindik berdi, - dedi Nurymjan Dúısenbekov.
Ol buǵan deıin bes ıtpen jumys istegen. Aıtýynsha, kınologtar kúshikterdi týylǵannan keıin qyzmettik baǵyttaryna qaraı bólip, tórt aı boıy arnaıy jattyqtyrady. Ár ıtti ıkemi men qabiletine qaraı iz kesý, qaraýyldaý, shabýyldaý nemese jarylǵysh zattardy anyqtaýǵa beıimdeıdi.
- Úıde tóbet asyraımyn. Biraq úıdegi asyrandy ıt pen qyzmettik ıttiń kútimi eki bólek. Qyzmettik ıtterge barlyq jaǵdaı jasalǵan. Ystyq aýa raıynda kún saıyn, al sýyq mezgilde aptasyna eki ret shomyldyramyz. Sonymen qatar aı saıyn densaýlyǵyn teksertip, qajet bolsa, em-dom jasatyp turamyz. Mundaı kútim ıttiń sergek ári qyzmetke árdaıym daıyn bolýyna kómektesedi. Taǵy bir aıta ketetin nárse, ıt pen ıesiniń arasynda erekshe baılanys ornaıdy. Qyzmet barysynda úırenisip qalǵan ıt ıesine baýyr basyp ketedi. Sondyqtan jańa ıtke úıretý nemese burynǵy ıtti basqa kınologqa berý ońaı emes. Bul – tek jumys emes, shynaıy seriktestik pen senimge negizdelgen qarym-qatynas. It kúdikti zatty baıqaǵan kúnniń ózinde ıesiniń úıretý tásiline qaraı ártúrli belgi beredi. Máselen, biri úredi, biri otyrady, endi biri basymen meńzeıdi, - dedi maman.
Kınologtyń jumys kúni 1-1,5 saǵatqa sozylatyn tańǵy jattyǵýdan bastalady. Odan keıin iz kesý, ıis taný, kúzet ýchaskelerin baqylaýǵa ulasady.
– Qyzmettik ıttiń psıhologııasyn, minezin, qımylyn túsinip, baǵyt-nusqaý beremiz. Olar da soǵan saı tóńirekke túgel kóz júgirtip, ár dybysqa eleń etip, kúmán týsa, birden belgi beredi. Negizi qyzmettik ıtterdi 7 aılyǵynan qolǵa úırete bastaımyz, - dedi keıipkerimiz.
Ýaqyty kelgende qyzmettik ıtter de «zeınetkerlikke shyǵady». Mysaly, iz kesýshi ıtterdiń qyzmet atqarý ýaqyty shamamen segiz jyl eken. Keıipkerimiz kınolog mamandyǵy ózin shydamdylyqqa, serigine senýdi úıretkenin atap ótti.
Buǵan deıin biz Shyǵys Qazaqstan oblysynda kınolog bolyp jumys isteıtin Marına Tsýkanovamen suhbatty jarııalaǵanbyz.