Itin polıtseılerge aıtaqtaǵan turǵynnyń ústinen qylmystyq is qozǵaldy
TALDYQORǴAN.QazAqparat - Almaty oblysyndaǵy Tekeli qalasy turǵynynyń ústinen polıtseılerge ıtin aıtaqtatqany úshin qylmystyq is qozǵaldy. «Kıller» esimdi ıt tártip saqshysynyń birine aıtarlyqtaı jaraqat keltirgen, dep habarlaıdy QazAqparat tilshisi.
Almaty oblystyq polıtsııa departamentiniń málimetinshe, 4 qazan kúni Tekeli qalalyq aýrýhanasyna ıt qaýyp alǵan 17 jastaǵy turǵyn júgingen. Anyqtala kele, onyń kórshisi ekeýiniń arasynda kıkiljiń paıda bolyp, sońynda kórshisi óziniń ıtin oǵan qarsy baǵyttaǵan. Iesiniń buıryǵynan keıin «Kıller» esimdi janýar oǵan umtyla jónelgen.
«Osy jaıtty anyqtaý maqsatynda Tekeli qalasynyń ýchaskelik ınspektory jáne patrýldik polıtsııa qyzmeti ıttiń ıesiniń úıine barǵan. Biraq, ishimdik iship alǵan úı ıesi ıtin polıtsııa ókilderine qaraı aıtaqtaǵan. Saldarynan bir polıtsııa ókiline aıtarlyqtaı jaraqat kelip, onyń jarasyn medıtsına qyzmetkerlerine tigýge týra kelgen. Al úıdiń ıesin de onyń ıtin de tártip saqshylary ustap, qalalyq polıtsııa bólimshesine jetkizgen», - dep málimdedi atalǵan vedomstvadan.
17 jastaǵy jasóspirimge ıtti qarsy qoıǵany úshin turǵyn ÁQBK 408 jáne 434 baptary boıynsha ákimshilik jaýapkershilikke tartylǵan. Al bılik ókiline qatysty kúsh qoldaný ıaǵnı, QR QK 380-babyna sáıkes sotqa deıingi tergeý amaldary júrip jatyr.
«Iesiniń áreketi úshin ıttiń ózi jaýapqa tartylady ma belgisiz. Ol jaǵyn sot sheshedi. Al qazir tergeý barysynda ıt óziniń ıesine qolhat arqyly berildi», dep tolyqtyrdy oblystyq polıtsııa departamentiniń baspasóz qyzmeti.
