Iti úshin adam pyshaqtaǵan petropavldyqqa sot úkimi shyqty
PETROPAVL. QazAqparat – Petropavl qalalyq soty ıti úshin adamǵa pyshaq salǵan er adamdy 3 jylǵa bas bostandyǵynan aıyrdy, dep habarlaıdy QazAqparat tilshisi.
Oqıǵa 2019 jyly 18 qyrkúıek kúni bolǵan edi.
Itimen aýlada serýendep júrgen Petropavl turǵyny Aleksandr Slavetskııge ótip bara jatqan adam janýarǵa tumyldyryq kıgizý kerektigin eskertken. Staffordshır tererdiń ıesi birden ashýǵa berilip, eskertý jasaǵan azamatqa ıtin aıtaqtap, arqasyna as pyshaǵyn suǵyp alǵan.
Petropavl qalalyq sotynda 40 jastaǵy Aleksandr Slavetskıı bolǵan oqıǵaǵa ókinish bildirdi. Onyń aıtýynsha, ótip bara jatqan azamat onyń ıtine ózi jaqyndaǵan. Tumyldyryǵyn sheship, yzalandyra bastaǵan. Al, ózi ıttiń tikendi qarǵybaýymen árli-berli siltep, ózin qorǵamaq bolǵan. Dál osy kezde ıti ıesine kómekke umtylyp, japa shegýshini qolynan qaýyp alǵan.
Sot eki tarapty da tyńdap, saralaı kele sottalýshynyń kinásiniń dáleldengenin jáne memlekettik aıyptaýshy suraǵan jazanyń oryndy ekenin aıtty.
Jazany taǵaıyndaý barysynda sot Slavetskııdiń mas kúıinde adamǵa shabýyl jasap, esh sebepsiz aýyr, qoǵam úshin qaýipti qylmys jasaǵanyn jáne ýchaskelik ınspektor bergen teris minezdemeni negizge aldy. Al Slavetskııdiń sotta bergen jaýaby «jaýapkershilikten qashý» dep qabyldady. Osyǵan baılanysty sot oǵan 3 jylǵa bas bostandyǵynan aıyrý jazasyn kesti.
