Itbalyqtardyń óleksesi ydyrap ketken, synama alý múmkin bolmady – mınıstrlik

NUR-SULTAN. QazAqparat – QR Ekologııa, geologııa jáne tabıǵı resýrstar mınıstrligi Kaspııden tabylǵan óli ıtbalyqtar men bekirelerdiń óleksesine qatysty túsinik berdi, dep habarlaıdy QazAqparat tilshisi atalǵan vedomstvonyń baspasóz qyzmetine silteme jasap.

«2022 jylǵy 14 mamyrda Mańǵystaý oblysy boıynsha Jaıyq-Kaspıı oblysaralyq basseındik balyq sharýashylyǵy ınspektsııasynyń balyq ınspektsııasy basqarmasynyń qyzmetkerleri Fort-Shevchenko teńiz portynyń jaǵalaýyndaǵy «Úrdúk» múıisi aýmaǵynan 64 óli ıtbalyq pen 5 bekire tuqymdas balyqty tapty. Tabylǵan ólekseler qatty ydyrap ketken, sondyqtan da zertteý júrgizý úshin synamalar alý múmkin bolmady. Demek, olardyń ólimi qysta bolǵan dep boljaýǵa bolady. Degenmen atalǵan jerden sý men aýa synamasy alyndy», - delingen habarlamada.

Mınıstrliktiń habarlaýynsha, atalǵan jaıtqa qatysty zertteý júrgizilip, nátıjesi bir aıdyń ishinde jarııalanady.

«Mańǵystaý oblysy boıynsha balyq ınspektsııasy basqarmasynyń ınspektorlary Kaspıı teńiziniń jaǵalaý aımaǵy men basqa da ýchaskelerine monıtorıng júrgizýde», - deıdi vedomstvodan.

Buǵan deıin Mańǵystaýda jaǵalaýdan taǵy 64 ıtbalyqtyń óleksesi tabylǵany týraly habarlaǵan edik.

Eske sala ketsek, sáýir aıynyń sońynda Kaspıı teńiziniń Mańǵystaý bóliginen 94 óli ıtbalyq tabyldy.