Itbalyqtardyń neden qyrylǵany belgili boldy
AQTAÝ. KAZINFORM — 3 qarasha kúni Jaıyq–Kaspıı oblysaralyq basseındik balyq sharýashylyǵy ınspektsııasynyń qyzmetkerleri Mańǵystaý oblysy Túpqaraǵan aýdany aýmaǵyndaǵy Kaspıı teńizi jaǵalaýyna monıtorıng júrgizý barysynda jaǵalaýǵa shyǵyp qalǵan ıtbalyqtardyń óleksesin anyqtaǵan bolatyn.
Atalǵan derek jergilikti Ekologııa departamenti, Mańǵystaý oblysy boıynsha mamandandyrylǵan tabıǵat qorǵaý prokýratýrasy, aýdan ákimdigi men ishki ister bólimi, Veterınarııalyq baqylaý jáne qadaǵalaý ınspektsııasy, sondaı-aq Gıdrobıologııa jáne ekologııa ınstıtýty, Kaspıı ıtbalyǵyn zertteý jáne qalpyna keltirý ortalyǵy, «Qazaq balyk» respýblıkalyq balyq sharýashylyǵy jáne akvakýltýra qaýymdastyǵy syndy barlyq múddeli memlekettik organdarǵa jetkizilgen. Jumys toby oqıǵa ornyna baryp, 112 ıtbalyqtyń óleksesin anyqtaǵan.
Gıdrobıologııa jáne ekologııa ınstıtýtynyń málimetinshe, ıtbalyqtardyń óleksesi shirip ketken. Bul málimet Mańǵystaý oblysy Túpqaraǵan aýdanynyń ishki ister bólimimen Biryńǵaı sotqa deıingi tergep-tekserýler tizilimine tirkeldi.
— Baǵdarlamalyq-nysanaly qarjylandyrý sheńberinde Kaspıı ıtbalyǵyn zertteýmen aınalysatyn ǵylymı uıym — Gıdrobıologııa jáne ekologııa ınstıtýtynyń mamandary oqıǵa ornynda ıtbalyq ólekselerin jaryp, zertteý úshin alynýy múmkin synamalardy jınaý jumystaryn júrgizip jatyr, — delingen habarlamada.
Tabylǵan ıtbalyqtardyń óleksesi balyq sharýashylyǵy ınspektsııasy men jergilikti atqarýshy organdar qyzmetkerlerimen sanıtarlyq normalarǵa saı jınalyp, joıylǵan.
Gıdrobıologııa jáne ekologııa ınstıtýty mamandary ıtbalyqtardy jobamen bir aı buryn qyrylýy múmkin dep boljap otyr. Ólekseler Túpqaraǵan aýdanynyń jaǵalaýyna batys baǵyttaǵy daýyldy jelmen tek endi ǵana shyqqan bolýy múmkin.
Ǵalymdardyń kópjyldyq zertteýleri negizinde ıtbalyqtardyń qyrylýyna ákelgen yqtımal sebep retinde olardyń ımmýnıteti men jalpy tózimdiliginiń álsireýi, sonyń saldarynan ınfektsııalyq aýrýlarǵa beıimdelgishtiktiń artýy kórsetilip otyr. Qazirgi tańda Kaspıı teńizi jaǵalaýyn baqylaý jumystary áli de jalǵasyp jatyr.
Eske sala keteıik, Mańǵystaýda taǵy da ıtbalyq qyrylyp jatqanyn jazǵan edik.
Al búgin qyrylǵan ıtbalyqtardyń sany júzden asqany belgili boldy.