Itbalyqtardyń qyrylýyna baılanysty qylmystyq is qozǵalýy kerek – táýelsiz ekolog
AQTAÝ. KAZINFORM – Kaspıı jaǵasynda qyrylǵan ıtbalyqtar sany 2 myńǵa jetti. Osy oraıda, Úkimet arnaıy komıssııa quryp, tergeý júrgizip, kinálilerge shyǵyndy ótetýi kerek. ECOJER qaýymdastyǵy Mańǵystaý oblysy boıynsha aımaqtyq ekologııalyq keńesiniń tóraǵasy, QR Ekologııa jáne tabıǵı resýrstar mınıstrligi Qoǵamdyq keńesiniń múshesi Ádilbek Qozybaqov osylaı deıdi.
Spıker máseleniń ekologııalyq qana emes, ekonomıkalyq zardabyna da toqtaldy.
«Bir ıtbalyqtyń kuny – 193 AEK (AShM-niń 2017 jylǵy buıryǵy boıynsha) nemese 712 556 teńge. Endi sony 2 myńǵa kóbeıtsek - 1 425 112 000 teńge. Al qazirgi jaǵdaıda ıtbalyq Qyzyl kitapqa engizilgen. 2000 ıtbalyq qyryldy. Bul - úlken bir rezonansty oqıǵa, tragedııa dep aıtýǵa bolady. Demek, qylmystyq is qozǵalýy kerek. Bul qylmystyq is bolǵannan keıin jazasyn da qatty kúsheıtý kerek dep oılaımyn. Úkimet arnaıy komıssııa quryp, tergeý júrgizip, kinálilerdi anyqtap, keltirilgen shyǵyndy ótetip, jazalaý kerek dep oılaımyn», - deıdi Ádilbek Qozybaqov.
Sondaı-aq ol tergeý-tekserý jumystaryna táýelsiz sarapshylardy tartý qajet dep esepteıdi.
«Bolashaqta osyndaı jaǵdaılar qaıtalanbaýy úshin barlyq monıtorıngke mindetti túrde táýelsiz sarapshylardy tartý kerek. Eger táýelsiz sarapshylar tartylatyn bolsa, onda ashyqtyq qamtamasyz etiletin edi. Qandaıda bir zań buzýshylyq anyqtalsa nemese monıtorıng durys júrgizilmeıtin bolsa, táýelsiz sarapshylar sol kezde aıtyp, túzetip, baqylap júretin edi. Al qazirgi tańda, ókinishke qaraı, sarapshylar tartylmaǵannan keıin, qazaqsha aıtqanda árkim oıyna kelgenin istep júr dep aıtýǵa bolady», - deıdi Ádilbek Qozybaqov.
Eske salaıyq, 24 qazan men 18 qarasha aralyǵynda Kaspıı teńiziniń jaǵalaýynan 1 989 ıtbalyqtyń óleksesi tabyldy.
Buǵan deıin Aýyl sharýashylyǵy mınıstrligi Kaspıı teńizinde qyrylǵan ıtbalyqtardy zertteýge qatysty aldyn ala málimetti jarııalaǵan bolatyn.
Araılym Qaldarbek
