Italııanyń premeri otstavkaǵa ketpek
ASTANA. QazAqparat - Italııanyń Premer-Mınıstri Matteo Rentsı konstıtýtsııalyq referendýmnyń nátıjesi boıynsha otstavkaǵa ketýge nıetti. Referendým barysynda ol usynǵan reforma el turǵyndary tarapynan qoldaý tappady, dep habarlaıdy Rıa Novostı agenttigi.
«Erteń men Mınıstrler keńesin shaqyramyn, sodan soń Kvırınal saraıyna baryp, memleket basshysyna otstavkaǵa ketý týraly ótinish beremin»,-dedi Rentsı referendýmnyń qorytyndysyna baılanysty ótken baspasóz-máslıhatynda.
Premer referendýmǵa qatysqan barlyq Italııa azamattaryna alǵysyn bildirdi.
«Jaǵdaı qalaı bolǵan kúnde de men barlyq azamattarǵa alǵysymdy bildiremin. Birneshe mınýttardan soń men Kıdjı saraıynan tikeleı efırge shyǵamyn»,-dedi Rentsı óziniń Twitterdegi mıkroblogynda.
