Italııanyń Neapol qalasynda Jazǵy ýnıversıada bastaldy
NUR-SULTAN. QazAqparat - Búgin Italııanyń Neapol qalasynda 2019 jylǵy Jazǵy ýnıversıada oıyndary jalaýyn kóterdi, dep habarlaıdy QazAqparat tilshisi.
Jazǵy ýnıversıada oıyndarynyń ashylý saltanatynda álemniń 19 memleketinen 800-ge jýyq ónerpaz keldi. Olardyń arasynda eń tanymaly retinde ıtalıan ánshisi Andrea Bochellıdi atap ótýge ábden bolady.
Jınalǵandar aldynda Italııa prezıdenti Serdjo Mattarella óz tilektestigin bildirdi.
Jazǵy ýnıversıada oıyndary 3-14 shilde aralyǵynda ótedi. Oǵan álemniń 170 memleketinen sportshylar keledi dep josparlanyp otyr. Onda 5971 úmitker sporttyń 18 túrinen 222 medal jıyntyǵyn sarapqa salady. Jarysqa qatysýshylar fýtbol, basketbol, voleıbol, sý doby, sýda júzý, sýǵa sekirý, sporttyq gımnastıka, kórkem gımnastıka, dzıýdo, jeńil atletıka, ústel tennısi, jelkendi sport, regbı, nysana kózdeý, sadaqpen atý, tennıs, thekvondo, semserlesý sekildi sport túrlerinen baq synaıdy.
Italııa Jazǵy ýnıversıada oıyndaryn óz tarıhynda tórtinshi márte qabyldap otyr. Atalmysh dúbirli doda 1959 jáne 1970 jyldary Týrınde, 1975 jyly Rım qalasynda jalaýyn kóterdi. Al Qysqy ýnıversıada oıyndary bul memlekette alty márte ótken.
Ýnıversıdaǵa qatysýshylarǵa qoıylatyn talaptar bar. Quramaǵa ilikken jastar sol eldiń azamaty bolýy tıis. Sondaı-aq, jasy 17-den tómen jáne 28-den joǵary bolmaýy talap etiledi. Basty talabynyń biri - joǵary oqý oryndarynyń stýdenti nemese ony bitirgenine bir jyldan aspaýy qajet.
Bıylǵy Jazǵy ýnıversıada oıyndarynda bizdiń elimizdiń atynan 94 sportshy el namysyn qorǵaıdy. Olardyń arasynda semserlesýden 18 qazaqstandyq sportshy qatysady. Al 16-y jeńil atletıkada jarys jolyna shyqsa, 15-i thekvondodan taıtalasqa túsedi. Al sadaqpen atýdan 8, nysana kózdeýden 10, sporttyq jáne kórkem gımnastıkadan 6, tennısten 4, dzıýdodan 10, sýǵa júzýden 7 sportshy qatysady.
