Italııanyń qabyldaý ortalyǵyna bir táýlikte 600-den astam mıgrant jetkizildi
RIM. QazAqparat – Bir táýlik ishinde teńizdegi apattan zardap shekken 600-den astam mıgrant ıtalııalyq Lampedýza aralyna jetkizildi. Araldyń qabyldaý ortalyǵy tolyp qaldy. Bılik ókilderi mıgranttardyń bir bóligin Sıtsılııaǵa jiberip jatyr, dep habarlaıdy QazAqparat Euronews agenttigine silteme jasap.
Teńizdegi apattan zardap shekken, adamdar mingen 10 qaıyq ıtalııalyq Lampedýzaǵa senbi kúni keldi. Olar jaǵaǵa 430 adamdy jetkizdi.
Keıingi kúnderi kún jylyp, aı tolyp jaryq bolǵandyqtan Jerorta teńizin kesip ótpekshi bolǵan mıgranttar sany artqan. Juma kúni 247 adam mingen 7 qaıyq Lampedýzaǵa jetkizilgen bolatyn.
Lampedýzadaǵy qabyldaý ortalyǵyndaǵy adamdar sanyn azaıtýǵa tyrysqanyna qaramastan, syıymdylyq 3 eseden asyp ketti: ortalyqta 900-ge jýyq adam bar.
Jergilikti bılik Rımmen kelise otyryp mıgranttardyń bir bóligin sıtsılııalyq Porto-Empedoklege Novelli paromymen jiberedi.
