Italııanyń Iskıa aralyndaǵy kóshkin: Qutqarýshylar joǵalǵandardy izdep jatyr
ASTANA. QazAqparat – Italııanyń ońtústigindegi Neapol qalasyna taqaý ornalasqan Iskıa aralynda nóser jaýyn saldarynan laı kóshkini júrip, birneshe adam mert boldy, dep habarlaıdy QazAqparat tilshisi VVS agenttigine silteme jasap.
Agenttiktiń málimetterinshe, senbi kúni tańǵa jýyq jaǵalaýǵa jetken laı men qoqys aǵashtardy qulatyp, úılerdi buzyp, ondaǵan kólikti teńizge aǵyzyp áketken. Qalyń laıdyń astynan bir áıeldiń múrdesi tabylǵan, taǵy birneshe adamnyń iz-tússiz joǵalǵany týraly aqparat bar. Aýa raıynyń qolaısyzdyǵy saldarynan qutqarýshylar ondaǵan úıge jete almaı otyr.
«Shamamen tańǵy saǵat úshte gúrildi estidik. Sodan keıin birinshi kóshkin, al shamamen taǵy beste ekinshi kóshkin júrip ótti. Óte qorqynyshty boldy», - deıdi qala turǵyny Lıza Mochchıaro «Ansa» aqparat agenttigine bergen suhbatynda.
Italııa Іshki ister mınıstri Matteo Pıantedozı jýrnalısterge ahýaldyń kúrdeli ekendigin, iz-tússiz joǵalǵan adamdar laı kóshkini qursaýynda qalý múmkindigin aıtqan.
Aralda 6 saǵattyń ishinde 155 mm jaýyn-shashyn jaýǵan. Iskıa araly ornalasqan Kampanııa óńirinde birneshe kún boıy jańbyr jaýyp tur. Qolaısyz aýa raıy saldarynan óńirde 2 adam qaza tapqan.
Buǵan deıin eldiń Infraqurylym mınıstri Matteo Salvını laı kóshkini saldarynan 8 adamnyń mert bolǵanyn málimdegen edi. Alaıda, keıinirek Іshki ister mınıstri adamdardyń qaza tapqany týraly derektiń áli naqtylanbaǵanyn atap ótti.
Osyǵan deıin Italııada laı kóshkini júrip, ondaǵan adam izdestirilip jatqanyn habarlaǵan bolatynbyz.
Sýret: BBC