Italııanyń Genýıa qalasynda kópirdiń qulaýyna baılanysty tótenshe jaǵdaı jarııalandy
ASTANA. QazAqparat - Italııanyń premer-mınıstri Djýzeppe Konte Genýıa mańyndaǵy kópirdiń qulaýyna baılanysty 12 aıǵa TJ rejimin engiziletinin jarııalady, dep habarlaıdy QazAqparat reseılik TASS agenttigine silteme jasap.
«Biz Djovannı Totıdiń (soltústik ıtalııalyq Lıgýrııa oblysy ákimshiliginiń basshysy - avt.) 12 aıǵa TJ engizý týraly usynysyn qabyl aldyq», - dedi ol Mınıstrler keńesiniń shuǵyl otyrysynan keıin ótken baspasóz máslıhatynda.
Onyń aıtýynsha, qaıǵyly oqıǵa saldaryn joıý úshin €5 mln qajet bolady. Lıgýrııa oblysy ákimshiliginiń basshysy Djovannı Totı Genýıanyń mańaıyndaǵy kópirdiń qulaýyna baılanysty sársenbi kúni eldiń ortalyq úkimetine ulttyq tótenshe jaǵdaı rejimin engizý týraly ótinish bildergen. Genýıa qalasy Lıgýrııanyń ákimshilik ortalyǵy ekeni belgili.
Qalalyq prefektýranyń málimetinshe, kópirdiń kúıreýi saldarynan 39 adam qaza tapqan. Zardap shegip, aýrýhanaǵa jetkizilgen on alty adamnyń on ekisi aýyr halde jatyr. Oqıǵa ornynan 632 adam evakýatsııalandy, basym kópshiligi iz-tússiz joǵalǵan.
Eske sala ketsek, 14 tamyzda Genýıada avtokólik kópiri qırady. Aspaly kópir Genýıany Frantsııa shekarasyndaǵy Ventımılıa qalasymen jalǵastyratyn Jerorta teńizi jaǵalaýyndaǵy A10 magıstreliniń bir bóligi. Kópirdiń bıiktigi 50 metr bolǵan.
