Italııanyń eks-premeri dúnıeden ozdy
RIM. 7 mamyr. QazAqparat - Italııa Úkimetin birneshe márte basqarǵan Djýlıo Andreottı 95 jasynda óziniń Rımdegi páterinde qaıtys boldy.
Dj. Andreottı el parlamenti joǵarǵy palatasynyń eń qart múshesi bolǵan. Sońǵy ýaqytta ol qoǵamdyq qyzmetke aralaspady jáne jaqynda ótken respýblıka prezıdentin saılaýda daýys berýge qatysqan joq. Sońǵy bir jyl ishinde densaýlyǵy syr berýine baılanysty ony eki ret aýrýhanaǵa jatqyzǵan bolatyn.
Andreottı 1919 jylǵy 14 qańtarda týǵan. Óziniń saıası mansabynda ol Qarjy, Ónerkásip, Іshki ister, Qorǵanys, Syrtqy ister mınıstrlikterin basqardy. Sonymen qatar, birneshe ret Italııanyń mınıstrler keńesiniń basshysy boldy. Andreottıdiń sońǵy ret premer bolǵan merzimi sybaılas jemqorlyqqa qarsy kúrespen este qaldy. Mafııamen baılanysty degen aıyptaý boıynsha ózine qarsy is qozǵalyp, aqyr aıaǵynda aqtalyp shyqqan edi.
