Italııanyń soltústiginde daýyl soǵyp, Komo kóli arnasynan tasydy
Seısenbi kúni túnde jáne tańerteń Italııanyń soltústigine kúshti daýyl saldarynan Komo kóli arnasynan tasyp, Mılan ortalyǵyn sý basty. Kazinform agenttigi bul týraly CNN-ge silteme jasap habarlaıdy.
Týrısterdi qyzyqtyratyn kól jaǵasyndaǵy birneshe bardy sý basty, azamattyq qorǵaý organdary jaqyn mańdaǵy aýdandardan sýdy sorǵymen aıdap shyǵaryp, jyljymaly bógetter ornatýǵa májbúr boldy.
Komo, Monsa, Brıantsa jáne Mılan mýnıtsıpalıtetteri arqyly ótetin Sevezo ózeni de arnasynan tasydy.
Mılannyń keıbir aýdandaryna barý múmkin emes. Áleýmettik jelidegi jazbalarǵa súıensek, jergilikti metro stantsııasynyń baspaldaqtarynan sý aǵyp, jaıaý júrginshiler qatty jel kezinde bireýi qulap jatsa, endi bireýleri baǵanalarǵa jabysyp turǵan.
Qalalyq qaýipsizdik keńesiniń múshesi Marko Granellıdiń habarlaýynsha, ekpindi jel aǵashtardy tamyrymen julǵan, qurylys satylary qulap, shatyrlar julynǵan. Saqtyq sharasy retinde qulaǵan elektr jelilerin jóndeý jumystary júrgizilgenshe, qalanyń birneshe jerinde elektr qýaty sóndirildi.
Nóser jaýynnan ortalyq Italııadaǵy Toskana da zardap shekti.
Aptanyń sońyna deıin búkil Italııada jańbyr jaýady dep boljanyp otyr.
Bıylǵy jyl Italııada sý tasqyny saldary aýyr boldy. Mamyr aıynda eldiń soltústigindegi Emılııa-Romanıa aımaǵyndaǵy sý tasqynynan keminde 14 adam qaza tapty. 20-dan astam ózen arnasynan shyqty, júzdegen kóshkin júrip, úılerdi sý basty, egistik jerler zardap shekti.