Italııanyń ońtústiginde bolǵan jer silkinisinen 26 adam zardap shekti
ASTANA. KAZINFORM – Italııanyń ońtústiginde magnıtýdasy 4,7 bolǵan kúshti jer silkinisi saldarynan 26 adam zardap shegip, júzdegen turǵyn evakýatsııalandy, dep habarlaıdy BELTA agenttigi.
Bul týraly eldiń Azamattyq qorǵanys departamenti málimdedi.
Jer silkinisi saldarynan birneshe turǵyn úı qırap, basqa da ǵımarattarǵa zaqym keldi. Shamamen 300 turǵyn úıin tastap shyǵýǵa májbúr boldy. Qutqarýshylar men mamandar zardap shekken aýmaqty tekserýdi jalǵastyryp jatyr.
Bılik Potstsýolı porty men Kýmana temirjol jelisiniń jumysyna da irkilis bolǵanyn habarlady.
Magnıtýdasy 4,7 bolatyn jer silkinisi juma kúni Neapol mańyndaǵy Kampı-Flegreı janartaýlyq alqabynda tirkeldi. Corriere della Sera gazetiniń málimetinshe, bul sońǵy 40 jyldaǵy osy óńirdegi eń kúshti seısmıkalyq oqıǵalardyń biri bolǵan.
Materıal Kazinform agenttigine seriktes BELTA agenttigi tarapynan arnaıy usynyldy.
Aıta keteıik, buǵan deıin Kanada jaǵalaýynda magnıtýdasy 5,5 balǵa jetken jer silkinisi bolǵanyn habarladyq.
