Italııanyń Komo qalasynda merdi qaǵyp ketken soń velosıpedke tyıym salyndy
ASTANA. KAZINFORM — Italııanyń Komo qalasynyń meri Alessandro Rapınezeni elektr velosıpedi mingen adam qaǵyp ketken. Osy oqıǵadan keıin qala basshysy mundaı kólikti qaýipti «qubyjyq» dep atap, turǵyndardyń qaýipsizdigin qamtamasyz etý maqsatynda qala ortalyǵynda velosıpedpen júrýge tyıym saldy, dep habarlaıdy Kazinform BILD basylymyna silteme jasap.
— Árıne, bul jaǵdaı maǵan áser etti. Adamdar óz basynan ótkenine qaraı áreket etedi. Men mundaı kóliktiń qaǵyp ketýiniń qandaı ekenin óz basymnan ótkerdim, — dedi mer.
Italııa zańnamasynda kádimgi jáne elektrli velosıpedter bólek qarastyrylmaıtyndyqtan, jańa shekteý olardyń ekeýine de qatysty bolady. Endi qala ortalyǵynda velosıpedpen júrýge bolmaıdy, tek ony jetektep, jaıaý ótýge ruqsat etiledi.
Rapıneze 2022 jyly elektr samokattaryn jalǵa berýge de tyıym salǵan. Mer bul sheshimin áli de durys dep sanaıdy. Alaıda turǵyndardyń bir bóligi, ásirese jańa shekteýge qarsy.
— Ákimdik jeke adamnyń basyndaǵy máseleni búkil qoǵamǵa ortaq problemaǵa aınaldyryp otyr, — dedi Nova Como mádenı birlestiginiń tóraǵasy Vınchentso Falanga La Stampa gazetine bergen pikirinde.
Nova Como tyıym kúshine engennen keıin, qyrkúıek aıynda narazylyq retinde velosherý ótkizýdi josparlap otyr.
Eske salaıyq, buǵan deıin Italııada týrısterge arnalǵan at-arbalarǵa tyıym salynýy múmkin ekenin jazǵanbyz.
