Italııanyń 27 qalasynda aptap ystyqqa baılanysty «qyzyl» deńgeı jarııalandy
ASTANA. KAZINFORM – Italııada kúsheıgen aptap ystyqqa baılanysty eldiń barlyq 27 iri qalasynda eń joǵary – «qyzyl» meteorologııalyq qaýip deńgeıi jarııalandy, dep habarlaıdy ANSA agenttigi.
Italııa Densaýlyq saqtaý mınıstrliginiń bıýlletenine sáıkes, buǵan deıin eń joǵary qaýip deńgeıi engizilgen 25 qalaǵa taǵy eki qala qosyldy. Osylaısha qazirgi tańda eldiń barlyq iri qalasy «qyzyl» aımaqqa endi.
Sınoptıkterdiń boljamynsha, keıbir óńirlerde aýa temperatýrasy 40 gradýsqa deıin jetedi. Aptap ystyqtyń tolqyny keminde taǵy bir aptaǵa sozylady dep kútilip otyr.
Densaýlyq saqtaý mınıstrligi «qyzyl» deńgeı uzaqqa sozylǵan aptap ystyqtyń búkil halyqtyń densaýlyǵyna eleýli qaýip tóndiretinin bildiretinin málimdedi.
Vedomstvonyń túsindirýinshe, bul eskertý tek qarttar, balalar men sozylmaly aýrýy bar adamdarǵa ǵana emes, deni saý azamattarǵa da qatysty.
Italııada bıyl aptap ystyqtyń tórtinshi tolqyny tirkelip otyr. Buǵan deıingi qatty ystyq kezeńderinde elde joǵary temperatýra saldarynan adam ólimi tirkelgen.
Sarapshylardyń aıtýynsha, joǵary temperatýra kúndelikti ómirge de keri áserin tıgizip, turǵyndardyń densaýlyǵyna qaýip tóndirip, óńirlerdegi órt qaýpin kúsheıtip otyr.
Aıta keteıik, jýyrda Seýlde aptap ystyqqa baılanysty alǵash ret eń joǵary qaýip deńgeıi jarııalandy.
Al Ulybrıtanııadaǵy qýańshylyq ónim kólemin azaıtyp, baǵanyń ósýine ákeldi.
