Italııamen jańa seriktestik: €1 mlrd aınalymy bar agroqor qurylmaq
ASTANA. KAZINFORM — QR Premer-mınıstriniń orynbasary — ulttyq ekonomıka mınıstri Serik Jumanǵarın TRAMITE GROUP negizin qalaýshy, Qazaqstan-Italııa saýda-ónerkásip palatasynyń ókiletti ókili Djanantonıo Trametpen kezdesti, dep habarlaıdy Úkimettiń baspasóz qyzmeti.
Talqylanǵan negizgi taqyryp — ıtalıandyq ınvestorlardyń eki el arasyndaǵy saýda-ekonomıkalyq áriptestikti keńeıtýde aýyl sharýashylyǵy ónimin jetkizýdiń ıntegratsııalanǵan júıesin qalyptastyrý jónindegi bastamasy.
Djanantonıo Tramet TRAMITE GROUP-ty jetekshi eýropalyq bólshek saýda jelisindegi 30 jyldan asa tájirıbesi bar ıtalıandyq azyq-túlik naryǵynyń kóshbasshysy retinde tanystyrdy. Kompanııa «Astana» halyqaralyq qarjy ortalyǵynyń (AHQO) bazasynda tirkeletin Italııa-Qazaqstan saýda konsortsıýmy men ınvestıtsııalyq qoryn qurýǵa bastamashy bolýda. Jobanyń bastapqy kapıtaly €500 mln kóleminde. Konsortsıýmnyń boljamdy jyldyq aınalymy €1 mlrd-qa jetedi. Qor menshiginiń qurylymy ıtalııalyq venchýrlik ınvestorlar men SIMEST (CDP Group enshiles qurylymy) úshin 51%, qazaqstandyq «Báıterek» holdıngi úshin 49%.
Joba maqsaty — qazaqstandyq óndirýshilerdiń Eýropa men basqa aımaqtardyń naryǵyna shyǵýyna múmkindik beretin senimdi logıstıkalyq jáne ınvestıtsııalyq platforma qurý. Eksportta astyq, et, ósimdik maıy, burshaq daqyly, sút ónimi, keptirilgen jemis, kókónis pen jemis pıýresi bar. Saýda aımaǵy EO, Reseı, TMD, Qytaı, Ońtústik-Shyǵys Azııa, Parsy shyǵanaǵy men AQSh elderin qamtıdy.
TRAMITE GROUP keshendi yntymaqtastyq tásilin usynýda. Bul Qazaqstannyń agroónerkásiptik kesheni ınfraqurylymyna ınvestıtsııa quıý, Parmafood, Inalpi, Sterilgarda, Zanetti sııaqty jetekshi eýropalyq kompanııalarmen uzaqmerzimdik satyp alý kelisimsharty, sondaı-aq jetkizý tizbegin birlesip basqarý. Djanantonıo Tramettiń aıtýynsha, ıtalııalyq azyq-túlik ındýstrııasynyń jeti iri kompanııasy bul kúnde Qazaqstanda óz óndirisin ornatýǵa qyzyǵýshylyq tanytyp otyr.
Túrkistan oblysyndaǵy «AGRIQA Azııa» JShS iske asyratyn «Shardara eksporttyq agroónerkásiptik klasteri» jobasy qyzý talqylandy. 2024–2028 jyldary jobaǵa €200 mln salynady. Oǵan 22 gektarlyq jylyjaı keshenin, jemis-jıdek kombınatyn, jońyshqa túıirshikteý zaýytyn, qyzanaq zaýytyn salý jáne tamshylatyp sýarylatyn 8000 gektar jerdi ıgere otyryp, agrodıvızıondy damytý kiredi.
Vıtse-premer Serik Jumanǵarın Qazaqstanda qolaıly ınvestıtsııalyq ahýal qalyptastyrý basty nazarda ekenin atap ótti.
— El Úkimeti ınvestıtsııalyq jobalardy tabysty iske asyrýǵa yqpal etetin ońtaıly jaǵdaı jasaýǵa bar kúshin salýda. Biz agroónerkásiptik keshendi damytýǵa arnalǵan Qazaqstan-Italııa ınvestıtsııalyq qoryn qurý bastamasyn qoldaýǵa tolyq daıynbyz. Bul joba eksporttyq áleýetti arttyrý men ekonomıkalyq baılanysty nyǵaıtýda aıtarlyqtaı yntalandyrý bolmaq. Bizdiń yntymaqtastyǵymyz ózara tıimdilik pen strategııalyq senimge negizdelgen jemisti halyqaralyq áriptestiktiń jarqyn úlgisi bolatynyna senimdimin, — dedi Serik Jumanǵarın.
Vıtse-premer QR Saýda jáne ıntegratsııa mınıstrligine ózara is-qımyldy arttyrý úshin birlesken jobalardy odan ári talqylap, iske asyrýda qazaqstandyq jáne ıtalıandyq óndirýshilerdi biriktiretin saýda-ekonomıkalyq mıssııany jedel uıymdastyrýdy tapsyrdy.
Buǵan deıin Ulttyq ekonomıka mınıstri Serik Jumanǵarın Qazaqstan men Rýanda qarym-qatynasyna pikir bildirdi.