Italııalyqtar bilim salasyndaǵy reformaǵa qarsy ereýilge shyqty
ASTANA. QazAqparat - Italııanyń Neapol qalasy turǵyndary úkimetke qarsy ereýilge shyǵyp, polıtsııamen qaqtyǵysty.
Narazylyq aktsııasy el premer-mınıstri Matteo Rentsıdiń shaharǵa kelý qarsańynda boldy. Ony solshyl belsendiler men muǵalimder uıymdastyrǵan, dep habarlaıdy 24.kz.
Sherýge shyqqandar bilim salasyna engizilgen jańa reformaǵa qarsy. Onda memleketten bul salaǵa bólinetin qarjy qysqaryp, muǵalimderdi jumystan shyǵarý zańdylyqtary jeńildetilgen. Oǵan qosa ustazdarǵa jumys isteıtin bilim ornyn ózi tańdaýyna múmkindik berilmegen.
Premer-mınıstr keledi dep «San Karlo Opera úıiniń» aldyna jınalǵan top polıtsııa qorshaýyn buzyp ótýge tyrysty. Alaıda tártip saqshylary olarǵa toıtarys berdi. Ereýilshiler men polıtsııa arasyndaǵy qaqtyǵys shamamen eki saǵatqa sozylǵan. Alaıda jaraqat alǵandar men qamaýǵa túskender týraly eshqandaı derek joq.
