Italııalyq JOO rektory Batys Qazaqstan ýnıversıtetiniń qurmetti professory atandy
ORAL. QazAqparat - M.Ótemisov atyndaǵy Batys Qazaqstan memlekettik ýnıversıteti men Italııanyń Neapol Shyǵys ýnıversıteti ózara qarym-qatynasyn nyǵaıta túsetin bolady, dep habarlaıdy QazAqparat tilshisi.
Osy oraıda bilim berý men akademııalyq áriptestik salasyndaǵy memorandýmǵa M.Ótemisov atyndaǵy BQMÝ rektory, professor Ashat Imanǵalıev pen «L'Orientale» Neapol ýnıversıtetiniń rektory, professor Elda Morlıchchıo (Italııa) qol qoıdy.
Bul kelisim ortaq baǵdarlamalar jasaqtaý múmkindikterine, stýdentter men oqytýshylardyń akademııalyq almasýlaryna, ózara biliktilikti arttyrýǵa, ǵylymı sımpozıýmdar men mádenı sharalardy birlese uıymdastyrýǵa jol ashady.
Memorandýmǵa qol qoıý rásimi «L'Orientale» Neapol ýnıversıtetinde Qazaqstan Respýblıkasynyń Rımdegi elshiligi qyzmetkerleriniń qatysýymen ótti.
Saltanatty shara kezinde batysqazaqstandyq JOO basshysy A.Imanǵalıev Neapol ýnıversıtetiniń rektory Elda Morlıchchıoǵa «M.Ótemisov atyndaǵy BQMÝ-dyń qurmetti professory» kýáligin tabys etti.
Kúni búgin Batys Qazaqstan memlekettik ýnıversıteti 100-den astam Eýropa, Azııa, AQSh jáne Reseı bilim berý uıymdarymen kelisimge qol qoıyp, baılanys jasaýda. Mysaly, BQMÝ-da Ońtústik Koreıadan doktor Lı Chjon Hıýn eki jyl boıy akademııalyq utqyrlyq aıasynda top-menedjer retinde kóptildilik ınstıtýtynyń jetekshisi bolyp qyzmet jasasa, 2018 jyldan Polsha elinen Uly Kazımır ýnıversıtetiniń professory Anna Banchkovska kelip, qyzmetin bastaýda.
Aıta keteıik, M.Ótemisov atyndaǵy Batys Qazaqstan memlekettik ýnıversıteti búginde 16 halyqaralyq qaýymdastyq pen jobalardyń seriktesi bolyp otyr, olardyń arasynda Eýropa ǵylymı qoǵamy (Gannover, Germanııa), REGENA joǵary oqý oryndarynyń qaýymdastyǵy, Amerıka zańgerler qaýymdastyǵy (AQSh), Erasmus Mundus pen Eýropalyq ýnıversıtetter qaýymdastyǵy (EUA, Belgııa) jáne taǵy basqalar bar.
