Italııalyq kompanııa Túrkistan oblysynda kún elektr stansasynyń qurylysyn bastady
Investıtsııalyq jobanyń jalpy quny 12 mlrd teńgeni quraıdy. Otyrar aýdanyndaǵy Sháýildir aýylynyń mańynda qýattylyǵy 50 MVt kún elektr stansasynyń qurylysy boıynsha jumystar bastaldy. Saltanatty rásimge Italııadan arnaıy kelgen delegatsııa men Túrkistan oblysy ákiminiń orynbasary Meıirjan Myrzalıev qatysty.
«Energııanyń balamaly túrlerin damytýǵa, kún men jel energııasyn paıdalanatyn tehnologııalardy belsendi engizý úshin barlyq múmkindik bar.
Osy oraıda, elektr energııasy kózderin qaıta jańǵyrtý – oblys ekonomıkasynyń basym baǵyttarynyń biri. Túrkistan oblysynda 320 MVt elektr qýatynyń jetispeýshiligi baıqalady. Sondyqtan, oblystaǵy qajettilikti qanaǵattandyrý úshin búginde, kún jáne sý elektr stantsııalaryn salý boıynsha 10 ınvestıtsııalyq jobalar iske asyrylǵan», – dedi oblys ákiminiń orynbasary.
«Eni» halyqaralyq kompanııasy jergilikti enshiles «Arm Wind» JShS arqyly salyp jatqan elektr stansasy 100 gektar aýmaqty alyp jatyr. Munda 100 myńnan astam fotoelektrli panelder, qosalqy stantsııa men uzyndyǵy 8 shaqyrym bolatyn áýe elektr berý jelisi salynatyn bolady. Elimizdegi kún energetıkasy salasyndaǵy «Eni» tarapynan qolǵa alynǵan alǵashqy iri ınvestıtsııalyq jobasy elektr energııasyn bıylǵy jyldyń 4-toqsanynda beredi. 2022 jyldyń basynda tolyq aıaqtalyp, eldiń energetıkalyq sektoryn birtindep dekarbonızatsııalaýǵa, ıaǵnı kómirqyshqyl gazyn azaıtýǵa óz úlesin qosady. Kún elektr stansasynyń eń bir tıimdiligi – aýany lastamaıdy, ekologııalyq tıimdi.
Túrkistan oblysynda «ArmWind» JShS, «Hevel Kazahstan» JShS, «KZT Solar» JShS sııaqty 9 iri kún elektr stantsııasy jáne 6 sý elektr stantsııalarynyń qurylysy júrgizilýde. Bıyl Túrkistan oblysynda 52 mlrd teńgege 120 MVt kún sáýlesinen shyǵatyn stantsııalardy salý josparlanǵan.
