Italııalyq áıel lotereıadan Pablo Pıkassonyń kartınasyn utyp aldy
RIM. QazAqparat - Italııa turǵyny Pablo Pıkassonyń quny 1 mln eýrodan asatyn kartınasyn lotereıadan utyp aldy, dep habarlaıdy QazAqparat euronews.com resýrsyna silteme jasap.
Kartına 1921 jyly salynǵan. Natıýrmort. Christie's aýktsıon úıi uıymdastyrǵan oıynda 50 myń bılet oınatylǵan. Ár bılet 100 eýroǵa satyp alynǵan.
«Tipti kartına úıdiń qabyrǵasynda ilinip tursa da, ony urlap ketedi deıtindeı qaýip joq. Árıne, ony saqtandyrý kerek bolady. Biraq bul kartınany mıllıondaǵan adam kórgen. Bir de bir ury ony qaıta sata almaıdy», - deıdi lotereıa uıymdastyrýshysy Perı Koshen.
Jınalǵan aqshadan 900 myń eýro kartınanyń buǵan deıingi ıesine beriledi. Qalǵan soma qaıyrymdylyq uıymdaryna aýdarylady. Ol uıymdardyń maqsaty – Madagaskar men Kamerýndy taza aýyz sýmen qamtamasyz etý.
«Taza sýsyz ómir súrý múmkin emes. Koronavırýs adam ómiri sýsyz qanshalyqty qıyn ekenin bizge kórsetip berdi. Qol jýý – koronavırýstan saqtanýdyń eń tıimdi joly. Biraq sý bolmasa, qolyńdy qalaı jýasyń?», - dep atap ótti Koshen.
Uıymdastyrýshylardyń aıtýynsha, baqytty bılet jeltoqsanda satyp alynyp, lotereıa jeńimpazyna syıǵa berilgen.
