Italııalyq tanymal basylym mereıtoılyq shyǵarylymyn Qazaqstanǵa arnady
ASTANA. KAZINFORM – Eýropanyń kóne medıa resýrstarynyń biri «Corriere della Sera» quramyna kiretin ıtalııalyq «Cook» basylymy mereıtoılyq 80 shyǵarylymyn Qazaqstanǵa arnady.
Elimiz sheteldik aýdıtorııaǵa Ortalyq Azııanyń tartymdy gastronomııalyq baǵyty retinde tanystyrylyp, zamanaýı qazaq ashanasynyń «Neo Nomad» tujyrymdamasy pash etildi.
Arnaıy joba aıasynda redaktsııa týrıstik lokatsııalar men ulttyq ashananyń erekshelikterin zerdeledi. Shyǵarmashylyq top 50 Best Discovery tárizdi bedeldi halyqaralyq reıtıngterge engen birqatar qazaqstandyq meıramhanalardy jáne negizgi gastronomııalyq oryndardy aralady: Qazaq Gourmet, Auyl, Gruppo 63, Jinau, Sandyq jáne Tary. Materıaldyń bir bóligi Qazaqstandaǵy sharap jasaý salasynyń damýyna arnalǵan.
«Bul úlken memlekettegi tabıǵat pen mádenıettiń qaıtalanbas úılesimi qyzyǵýshylyq týdyrady. Shveıtsarııa peızajyna uqsas - Qaıyńdy kóli. Onyń aıdynyna batqan shyrshalar sýdan kóterilip, aýdarylǵan orman kórinisin jasaıdy. Arızonany oıǵa salatyn kanondar: Sharyn kanony týraly aıtpaý múmkin emes. Bul amerıkalyq kanonnan keıingi álemdegi eń úlkenderiniń biri. Odan ári tuzdy shólder (Mańǵystaý, Kaspıı teńiziniń jaǵalaýynda ornalasqan) jáne álemdegi eń keń qurǵaq dala jalǵasady. Alaıda ol eshqashan birdeı bolmaıdy: bul jazyqtar men ústirtterdiń ártúrli ósimdikter men reńktermen aýysýy», - dep atap ótedi basylym.
Italııalyq oqyrmandar Qazaqstan týraly kóbirek bilip, ulttyq ashananyń dámin sezinýge de múmkindik aldy. Materıaldar qazaq gastronomııasynyń tereńdigin, biregeıligin jáne baılyǵyn ashady. Jýrnal betterinde jáne Corriere della Sera resmı saıtynda sarapshy Áıgerim Musaǵajınova baýyrsaq, qurt, búırek jáne dástúrli súr et taǵamdaryn daıyndaý ádisimen bólisedi.
Aıta keteıik, Shyǵys Qazaqstan týrızmi tórt baǵytta damıtyny habarlandy.