Italııalyq sarapshy óz eli men Qazaqstandaǵy saılaýda qandaı zor aıyrmashylyq bar ekenin túsindirdi
ASTANA. KAZINFORM — Italııanyń Azııa isteri jónindegi ınstıtýtynyń Bas hatshysy Domenıko Palmıerı «Saılaý — 2026: qorytyndy jáne jańa saıası beles» atty sarapshylar alańynda Qazaqstandaǵy Quryltaı saılaýyna qatysty pikirin jáne áserin málimdedi.
— Biz Qazaqstanǵa aıryqsha kózqaraspen qaraımyz. Sebebi, bul el — Ortalyq Azııadaǵy eń mańyzdy seriktesimiz. Sonymen qatar, Italııany energııamen qamtamasyz etip otyrǵan basty memleketterdiń biri. Sondyqtan Qazaqstanda ne bolyp jatqanyn árdaıym baqylap otyrý — biz úshin ózekti másele, — dedi ol.
Odan bólek, ıtalııalyq maman Qazaqstanda saıası reformalardyń birneshe jyl buryn bastalǵanyn atap ótti. Al Quryltaı saılaýynyń tehnıkalyq jaǵynan qamtylýyn «ádettegideı keremet» dep baǵalady.
— Halyqtyń daýys berýge degen yntasy turǵysynan óz elim men Qazaqstandy salystyrsam, zor aıyrmashylyqty kóremin. Ár qazaq azamaty saıası naýqanda daýys berip, eldiń damý jolyna qatysty ún qatqysy keledi. Keshe saılaýshylardyń 74%-y daýys berdi. Al Italııada bul kórsetkish 50%-ǵa jetse, úlken jetistik dep qýanar edik. Azamattardyń saılaý ýchaskesine baryp, daýys berýi jaqsy úderis, — dedi ol.
Sonymen birge, Domenıko Palmıerı elimizdiń bir palataly Parlament júıesine kóshýine baılanysty oıyn aıtty.
— Men eki palataly Parlamenti bar elden kelip otyrmyn. Biraq Qazaqstan halqy tańdaǵan sheshimdi, ıaǵnı bir palataly Parlamentti jaqsyraq dep sanaımyn. Ol depýtattarǵa ónimdirek jumys isteýge múmkindik beredi. Jalpy, keshe Qazaqstan úshin óte mańyzdy kún boldy. Alaıda bul joldyń basy ǵana. Qabyldanǵan reformalardyń bári iske asyrylýy kerek. Aılar, jyldar ótken soń, nátıjesin kóremiz dep oılaımyn, — dedi ol.
Aıta keteıik, buǵan deıin QSZI basshysy Quryltaı saılaýy týraly «Saıası básekelestik artty» dep málimdegenin jazǵanbyz.
