Italııalyq atlet Paralımpıada tarıhyndaǵy alǵashqy transgender sportshy atandy

ASTANA. KAZINFORM – Italııalyq júgirýshi Valentına Petrıllo Paralımpıada oıyndary tarıhyndaǵy tuńǵysh transgender sportshy atandy.

50 jastaǵy sportshy Parıjde ótetin Paralımpıada oıyndarynda Italııa namysyn qorǵaıdy. Ol 200 jáne 400 metrge júgirýden jarysady.

Kózi nashar kóretinder sanatyna Petrıllo 2019 jyly aýysty. Byltyr ol álem chempıonatynda eki jarysta da qola júldeger atandy. Aýysýyna deıin Petrıllo erler sanatynda 11 ulttyq tıtýldy jeńip alǵan.

«Maǵan áli de sený qıyn, men shyndyqpen baılanysymdy joǵaltpaýǵa tyrysamyn, óıtkeni Tokıoǵa qatysý múmkindigim menen bir qadam alys boldy. Parıj oıyndary týraly Frantsııaǵa kelgennen keıin ǵana oılana bastaımyn», - dedi Petrıllo NBC News-ke bergen suhbatynda.

Halyqaralyq Paralımpıada komıtetiniń (HPK) prezıdenti Endrıý Parsons BBC Sport-qa Petrıllo Parıjde Dúnıejúzilik paraolımpıadalyq jeńil atletıka saıasatyna sáıkes alynǵanymen, sport álemi transgenderlerge qatysty birtutas ustanymda bolýy kerek dep sanaıdy.

Jeńil atletıka, velosport jáne júzýdi qosa alǵanda, kóptegen sport túrleriniń basqarý organdary sońǵy eki jylda transseksýal sportshylardyń áıelder arasyndaǵy jarystarǵa qatysý erejelerin kúsheıtti.

HPK basqarý organdaryna óz saıasatyn belgileýge múmkindik berse, Dúnıejúzilik paralımpıadalyq jeńil atletıka federatsııasy zańdy túrde áıel dep tanylǵan adamǵa ol kvalıfıkatsııalanǵan sanatta jarysýǵa múmkindik beredi.

Áıelder sportyna transgenderlerdi qosýǵa qarsylar erlerdiń jynystyq jetilýi sportshylarǵa tirek-qımyl apparatynyń damýynda úlken artyqshylyq beredi dep sanaıdy.

Eske sala ketsek, XVII jazǵy Paralımpıada oıyndary 28 tamyz ben 8 qyrkúıek aralyǵynda ótedi.

Jarysta 23 sport túrinen 549 medal jıyntyǵy oınatylady.