Italııadaǵy jer silkinisinen zardap shekken qazaqstandyqtar joq - Marat Iǵalı
ASTANA. QazAqparat - Italııadaǵy Jer silkinisinen zardap shekken qazaqstandyqtar joq. Bul jaıynda QR IDM Týrızm ındýstrııasy departamentiniń dırektory Marat Iǵalı óziniń Feısbýktegi paraqshasynda jazdy, dep habarlaıdy QazAqparat.
«Álemdik BAQ aqparattaryna sáıkes, 2017 jyldyń 18 qańtarynda Ortalyq Italııanyń Latsıo, Abrýtstso jáne Marke aýdandarynda birneshe saǵattyń ishinde magnıtýdasy 5 baldan asatyn 4 qýatty jer silkinisi oryn aldy. Jerasty dúmpýi Rımde de sezilip, metrodan adamdar qaýipsiz jerge kóshirildi. Zilzala oshaǵy Amatrıche qalasynan 7 shaqyrym jerde tirkelgen. Ótken jyldyń tamyzynda osy qalada qýatty jer silkinisi saldarynan 178 adam qaza bolǵan edi. Jergilikti bılik Ortalyq Italııada kólik qozǵalysyn qıyndatqan qalyń qardyń saldarynan jer silkinisinen qaza tapqandardyń sany men shyǵyn kólemin baǵalaý qıyn bolatyndyǵyn aıtýda.
Italıandyq BAQ aqparattaryna sáıkes, sársenbi kúni Ortalyq Italııanyń Abrýtstso aýdanynda, Gran-Sasso taýly alabynda qar kóshkini júrip, jergilikti Rigopiano di Farindola qonaq úıin basyp qalǵan»,- dedi ol.
Sonymen qatar Iǵalı QR Investıtsııalar jáne damý mınıstrliginiń Týrızm ındýstrııasy departamentine zardap shekken qazaqstandyq týrıster týraly jáne týrıstik operatorlardan tótenshe jaǵdaıǵa qatysty ótinishter jaıynda aqparat túspegendigin atap ótken.
«QR IDM Týrızm ındýstrııasy departamenti Italııada júrgen qazaqstandyq týrısterge sabyrlyq saqtap, jergilikti bıliktiń nusqaýlaryn oryndaýǵa keńes beredi. Italııaǵa týrlar uıymdastyratyn týrıstik operatorlardan shuǵyl arada týrısterge oryn alýy múmkin tótenshe jaǵdaı jaıynda eskertýdi jáne bul eldegi ahýaldy qadaǵalap otyrýdy ótinemiz. QR Investıtsııalar jáne damý mınıstrliginiń Týrızm ındýstrııasy departamenti Qazaqstan Respýblıkasynyń Syrtqy ister mınıstrligimen turaqty túrde baılanysqa shyǵyp otyr», - dep jazdy departamenti basshysy.
