Italııadaǵy jer silkinisi: Oqıǵalar xronıkasy

Qazirgi ýaqytta qutqarýshylar qulaǵan úılerdiń úıindileri astynda qalyp qoıǵan adamdardy qutqaryp jatyr. Qaza tapqandardyń basym bóligi Ýmbrııa, Latsıo men Marke aýdandarynda tirkelgen. Jer silkinisi Rım qalasynda da sezilgen. Zilzala Astana ýaqytymen sársenbi kúni saǵat 7:36-da tirkelgen.

Onyń oshaǵyna Norcha men Akkýmolı kommýnalary, Amatrıche men Peskara-del-Tronto qalalary jaqyn bolǵandyqtan, sol eldimekenderdegi turǵyndar qatty japa shekken.

«QazAqparat» HAA oryn alǵan oqıǵanyń xronıkasyn usynady.

07:36-da 6,0 qýatqa ıe alǵashqy dúmpý sezildi.

07:57-de Eýropalyq seısmologııalyq ortalyq (EMSC) taratqan málimetter boıynsha, dúmpý qýaty 6,1 ballǵa jetken.

 
8:34-te Ýmbrııa oblysynyń aýmaǵynda 5,4 balldyq jer silkinisi tárkeldi. Jer betindegi dúmpýler ortalyq Italııadaǵy birqatar qalalarda, sonyń ishinde Rım men Bolonıada sezildi. Kelip jetken aqparattar boıynsha eń úlken zalal Askolı Pıcheno, Fermo men Macheratta provıntsııalaryna keldi.

09:26-da «Reıter» agenttiginiń aqparaty boıynsha, Amatrıche qalasynyń meri qala ortalyǵynda birneshe iri ǵımarat qulaǵanyn xabarlady. Úıindiler astynda adamdar bar.

Saǵat 10:00-de qatty zardap shekken ıtalııalyq Amatrıche qalasyna arnaıy texnıka jóneltildi.
   

10:02-de qaza tapqandar týraly alǵashqy aqparattar paıda boldy. «RaiNews24» telearnasynyń xabarlaýynsha, eki adam kóz jumǵan.

10:15 saǵatta Akkýmolı kommýnasynyń meri Stefano Petrýchchı «RaiNews24» telearnasynyń efırinde bir adam kóz jumǵanyn rastady. Taǵy tórteýi úıindiler astynda qalǵan.

10:16-de Amatrıche meri BAQ arqyly: «Qalanyń jartysy joq. Joldar qulaǵan úılerdiń úıindisimen jabylyp qaldy. Adamdar sol úıindilerdiń astynda. Sel júrdi, kópir qulaýy yqtımal»,- dep málimdedi.

Arkýata-del-Tronto qalasynda eki adam mert bolǵany anyqtaldy.
   

11:21-da jartylaı jer astyna túsip ketken Amatrıche qalasynyń meri úıindiler astynan taǵy eki máıit shyǵarylǵanyn málim etti. «Jaǵdaı óte múshkil. Men adamdardyń daýysyn estip jatyrmyn, biraq eshteńe isteı almaımyn. Adamdar qulaǵan úılerdiń astynda qaldy. Bizge úıindiler astynan olardy alyp shyǵa alatyn mamandar qajet», - dedi Pırotstso Sky Tg24 telearnasyna bergen suxbatynda.

11:41-de ıtalııalyq BAQ kem degende 14 adamnyń qaza bolǵanyn xabarlady. Sońǵy málimetter boıynsha, Akkýmolı qalasynda alty adam, Arkýata-del-Trontoda eki adam, Amatrıchede bes adam qaza tapqan. Peskara-del-Tronto qalasynda bir bala kóz jumdy. Onyń ata-anasy úıindiler astynda qalǵan.
   

12:23-te «RIA Novostı» málimetteri boıynsha, Reseı TJM Italııadaǵy zilzala zardaptaryn joıýǵa qol ushyn berýge daıyn ekendigin xabarlady.

12:58-de kómek kórsetýge Polsha nıet tanytty.

13:44-te «RIA Novostı» Peskara-del-Tronto qalasynda 100-den astam adam iz-túzsiz ketkendigin jarııa etti. 10-nan astam adamnyń múrdesi tabyldy.

14:09-da Latsıo men Marke aımaqtarynda 24 adam kóz jumǵany málim boldy.

 
16:03-te qaza tapqandar sany 38-ge jetti.

16:29-da Qazaqstan Syrtqy ister mınıstrligi aldyn ala málimetter boıynsha, qaza tapqandardyń ishinde qazaqstandyqtar joq ekenin xabarlady.

16:40-ta Akkýmolı men Amatrıche bıligi qala mańynda úısiz qalǵan azamattarǵa arnap kúrkeler tikkendigin xabarlady.

16:50-de «RIA Novostı» agenttiginiń xabarlaýynsha, Eýroodaqtyń Italııaǵa kómek kórsetýge daıar ekendigin málim etti.

 
17:00-de járdem berýge Avstrııa men Frantsııa nıet tanytty.

18:26-da joıqyn zilzala qurbandarynyń sany 45-ke jetti. «RIA Novostı» agenttiginiń xabarlaýynsha, japa shekkender sany odan da kóp bolýy yqtımal. Sebebi, joǵalyp ketken adamdar sany tym kóp.

18:51-de «RIA Novostı» jergilikti BAQ-qa silteme jasaı otyryp, 4,9 balldyq jer silkinisi tirkelgendigin xabarlady. Jalpy kúni boıy Italııada 20 jerasty dúmpýi tirkeldi.

19:25-te «RIA Novostı» tilshisi Amatrıche qalasy jaryqsyz qalǵanyn xabarlady.

Sońǵy málimetter boıynsha, qaza tapqandar sany 70-ten asty.