Italııadaǵy sý tasqyny: eldiń soltústiginde 14 adam qaza tapty
RIM. QazAqparat - Juma kúni Italııanyń soltústigindegi Emılııa-Romanıa aımaǵynda sý tasqynynan qaza tapqandar sany 14-ke jetti. Ravenna qalasynyń bıligi eki shaǵyn qalanyń turǵyndaryn dereý evakýatsııalaý týraly sheshim qabyldady jáne múmkindiginshe halyqty saıahattaýdan aýlaq bolýǵa shaqyrdy, óıtkeni qaýip deńgeıi áli de eń joǵary qyzyl deńgeıde qalyp otyr, dep habarlaıdy QazAqparat VBC-ge silteme jasap.
Aımaqtyń evakýatsııalanǵan 15 myń turǵynynyń jartysyna jýyǵy ótken túndi qonaqúılerde nemese asyǵys jabdyqtalǵan sport zaldarynda ótkizýge májbúr boldy.
Zardap shekken aımaqtyń kóptegen qalalarynda adamdardy ystyq tamaqpen qamtamasyz etetin jyljymaly ashanalar jumys istep jatyr. Sý azdap tartylǵan jerlerde turǵyndar úılerin tazalaýǵa kiristi, degenmen kóptegen turǵyndar sý deńgeıiniń joǵary bolýynan áli kúnge deıin dalaǵa shyǵa almaı otyr.
Ravennanyń ózinde nóser áli tynbaı tur, qala meri Massımo Izola qalany qorshap turǵan tóbelerde ornalasqan aýyldardaǵy apatty jaǵdaı týraly habarlady. Kóshkinniń júrý qaýpi joǵary, bul aımaqtarǵa qutqarýshylardyń jetýi óte qıyn.
Degenmen, jumys jalǵasýda, qutqarýshylar sý tasqynynan zardap shekkenderdi áli evakýatsııalap jatyr.
Italııanyń soltústiginde 36 saǵat boıy jaýǵan tolassyz jaýynnyń saldarynan jarty jyldyq jaýyn-shashyn túsip, keltirilgen shyǵyn mıllıardtaǵan eýroǵa baǵalanyp otyr.
Sý tasqyny Imoladaǵy «Formýla-1» jarysyn da toqtatýǵa májbúr etti.
Juma kúni «Formýla-1» uıymdastyrýshylary zardap shekken aımaqtardy qalpyna keltirýge kómektesý úshin bir mıllıon eýro beretinderin aıtty. Buǵan deıin «Ferrarı» komandasy da osyndaı ýáde bergen bolatyn.
Legambiente ekologııalyq uıymynyń málimetinshe, 7 mıllıonǵa jýyq ıtalııalyq sý tasqyny qaýpi bar aımaqtarda turady.
2014 jyly sol kezdegi premer-mınıstr Matteo Rentsı Italia sacra (qaýipsiz Italııa) jedel tobyn qurdy, onyń mindeti sý tasqyny men kóshkinniń aldyn alý bolatyn. Alaıda, 2018 jyly Djýzeppe Konte úkimeti bul topty taratyp, eshqashan júzege asyrylmaǵan óz jobasyn jasady.
