Italııadaǵy saılaýda ońshyldar koalıtsııasy jeńiske jetti
ASTANA. QazAqparat - Italııadaǵy parlament saılaýynda ońshyldar jeńiske jetti. Resmı málimetter boıynsha Djordj Melonı jetekshilik etetin ońshyl-tsentrıstik «Italııa baýyrlary» partııasy halyq daýysynyń tórtten birin jınady, dep habarlaıdy QazAqparat Euronews.com agenttigine silteme jasap.
Ońshyl tsentrıstik koalıtsııa ókilderi arasynda eń kóp daýys jınaǵan Melonı Premer-Mınıstr laýazymyna basty úmitker bolyp otyr. Saılaýda jeńiske jetkennen keıingi sózinde ol óziniń úkimeti barlyq ıtalııalyqtardy biriktiredi dep ýáde berdi.
Koalıtsııaǵa keler bolsaq, Matteo Salvınıdiń «Lıgasy» men Sılvıo Berlýskonıdiń «Alǵa, Italııa» partııalarymen birge ásire ońshyldar 44%-dan astam daýys jınady. Solshyl tsentrıster – shamamen 26,5%. Olardyń arasynda 19 paıyzdan astam daýys jınaǵan Enrıko Letta basqaratyn Demokratııalyq partııa jaqsy nátıje kórsetip, «Italııa baýyrlarynan» keıingi ekinshi oryndy ıelendi. Demokrattar jeńilgenderin moıyndap, bolashaq parlamentte negizgi oppozıtsııalyq kúsh bolýǵa ýáde berdi.
Bıylǵy parlament saılaýyna daýys berýshilerdiń 64% ǵana qatysty, bul el tarıhyndaǵy eń tómen kórsetkish. 2018 jylmen salystyrǵanda 10%-ǵa az.
Buǵan deıin habarlaǵanymyzdaı, Italııanyń eks premer-mınıstri Marıo Dragı bastaǵan burynǵy úkimet shilde aıynda saıası daǵdarystan soń otstavkaǵa ketti. Dragı óz sheshimin bılik basyndaǵy koalıtsııanyń birligi joq dep túsindirdi. Keıin Italııa prezıdenti parlamentti taratyp jiberdi. El parlamentine kezekten tys saılaý 25 qyrkúıekte ótti.
Aıta keteıik, buǵan deıin Italııanyń jańa premer-mınıstri Djordja Melonı jaıly málimetterdi jarııalaǵan bolatynbyz. Ol memlekettiń tarıhyndaǵy osy laýazymdy ıelenetin tuńǵysh áıel atanýy múmkin.
Foto: euronews.com
