Italııadaǵy jaǵajaıda keıbir demalýshylarǵa qolshatyr ornatýǵa tyıym salyndy
ASTANA. KAZINFORM — Italııanyń Sardınııa aralynda Vıllasımıýs kýrorttyq qalasyndaǵy Pýnta Molentıs jaǵajaıynda erekshe shekteýler engizildi. Endi 10 men 65 jas aralyǵyndaǵy kelýshilerge jaǵajaıda qolshatyr ornatýǵa tyıym salyndy. Oǵan qosa, jaǵajaıǵa kirý aqyly boldy, dep habarlaıdy The Guardian.
Jergilikti bılik bul sheshimdi jaǵajaıdyń erekshe tabıǵı ortasyn saqtaý jáne aýmaqqa túsetin antropogendik júktemeni azaıtý maqsatymen túsindirdi.
Qolshatyrlardy tek 10 jasqa deıingi balalary nemese 65 jastan asqan qarttary bar otbasylarǵa paıdalanýǵa ruqsat etiledi. Biraq mundaı topqa bir ǵana qolshatyr ornatýǵa bolady.
Jańa erejeler tek qolshatyrlarǵa ǵana qatysty emes. Kelýshilerge shatyrlar, pavılondar jáne kóleńke beretin ózge de qurylymdardy ornalastyrýǵa tyıym salyndy. Bul shekteýler qazan aıynyń sońyna deıin kúshinde bolady.
Taǵy bir jańalyq — qoǵamdyq jaǵajaıǵa kirýdiń aqyly bolýy. Kirý quny bir adamǵa — 10 eýro.
Sheshim Italııa turǵyndary men týrıster arasynda qyzý talqylanyp jatyr. Áleýmettik jeli qoldanýshylary uzaq ýaqyt kúnniń astynda bolýdyń saldary — kúnge kúıip qalý, ystyq ótý jáne teri obyrynyń qaýpi artýy múmkin ekenin aıtyp, alańdaýshylyq bildirdi.
Keıbir pikir qaldyrýshylar bul erejelerdi ázilmen qabyldap, endi jaǵajaıǵa barý úshin «balany jalǵa alý» nemese «qart týysty birge alyp kelý kerek» dep qaljyńdady. Basqalary Pýnta-Molentısti boıkottaýǵa shaqyrdy.
Pýnta-Molentıs jaǵajaıy Sardınııadaǵy eń tanymal oryndardyń biri. 2025 jyldyń jazynda ol iri orman órtine baılanysty jabylǵan bolatyn.
Italııadaǵy qoǵamdyq jaǵajaılar týrıstik maýsym kezinde jıi shamadan tys júktemege ushyraıdy. Jeke jaǵajaılardaǵy shezlongtardy jáne jaǵajaı ınfraqurylymyn jalǵa alý baǵasynyń ósýi jaǵdaıdy odan ári qıyndatady.
Bıyl Qazaqstandaǵy kýrorttarda demalý quny qansha ekenin myna siltemeden oqı alasyz.
