Italııadaǵy taýly kýrort qardyń astynda qaldy

ASTANA. KAZINFORM — Italııanyń Pemont aımaǵyndaǵy Makýnıaga aýylyn qalyń qar basyp qaldy. Túnde qardyń qalyń jaýǵany sonsha, keı jerlerde onyń qalyńdyǵy bir jarym metrge jetti, dep habarlaıdy BILD.

Monte-Roza taý jotasynyń eteginde 1300 metrden astam bıiktikte ornalasqan aýyldyń kósheleri qar qursaýynda qalyp, aq ulpa kólikterdi basyp, jolda júrýdi qıyndatty.

Sınoptıkter jaýyn-shashynnyń 70 santımetrge deıin bolatynyn boljady, biraq qar aıtarlyqtaı qalyń jaýdy. Bılik mektepter men balabaqshalardy jaýyp, qar kóshkini qaýpi artatynyn eskertti. Óńirdegi keıbir joldar jabylyp, bir jergilikti temirjol jelisinde qyzmet kórsetý toqtatyldy.

Eske salaıyq, osydan birneshe kún buryn álemdegi eń úlken shól sanalatyn Saharada qar jaýdy. Mundaı qubylys bul óńirde óte sırek kezdesedi. Shamamen on jylda bir ret bolady.