Italııadaǵy oq-dári zaýytynda jarylys bolyp, adamdar evakýatsııalandy
ASTANA. KAZINFORM – Italııa astanasy Rımge jaqyn ornalasqan Kolleferro qalasyndaǵy oq-dári shyǵaratyn zaýytta jarylys boldy. Aldyn ala málimet boıynsha, kásiporyn qyzmetkerleriniń eshqaısysy zardap shekken joq, dep habarlaıdy BBC.
KNDS Ammo Italy tobyna tıesili zaýytta aldymen órt shyqqan. Corriere della Sera basylymynyń jazýynsha, tsehtardyń birinde oq-dárini nyǵyzdaıtyn qurylǵy órtengen.
Keıin jalyn zaýyt aýmaǵyna tarap, jarylys bolǵan. Onyń daýysy kórshiles eldi mekenderge deıin estilgen.
Órt sóndirýshiler men polıtsııa kásiporynǵa jarylysqa deıin, órt bastalǵan kezde jetken. Sol kúni jumys istegen 24 qyzmetkerdiń barlyǵy qaýipsiz jerge evakýatsııalandy.
Qaýipsizdik maqsatynda zaýyt mańyndaǵy joldar jabyldy.
– Jaǵdaı baqylaýda. Qaza tapqandar men zardap shekkenderdiń joq ekeni týraly resmı rastaýdy kútip otyrmyz, – dedi Kolleferro meri Djýlıo Kalamıta.
Onyń aıtýynsha, jarylys tolqynynan zaýyt mańyndaǵy birneshe úıdiń terezeleri synǵan.
– Baqytymyzǵa qaraı, jarylys jumys ýaqytynan tys kezde boldy. Áıtpese qaıǵyly jaǵdaıǵa ákelýi múmkin edi, – dedi ol.
Eske sala ketsek, buǵan deıin Sıtsılııada Etna janartaýynyń atqylaýyna baılanysty áýe qatynasynyń buzylǵany habarlanǵan.
