Italııadaǵy narazylyq aktsııalarynda 400 adam ustaldy
ASTANA. KAZINFORM — 24 qazanda Italııada qymbatshylyqqa jáne Djordjo Melonı úkimetiniń saıasatyna qarsy jańa narazylyq tolqyny boldy, dep habarlaıdy Kazinform DW-ge silteme jasap.
Tártipsizdikter kezinde polıtsııa toǵyz adamdy qamaýǵa aldy, taǵy 371 aldyn ala ustalǵan, sonyń 110-y kámeletke tolmaǵan.
17 jáne 18 qazanda narazylyq aktsııalarynan keıin týyndaǵan tártipsizdikterden keıin Italııa bıligi Mılanǵa 500 elıtalyq áskerı qyzmetshini jiberdi. Úkimet sonymen qatar kámeletke tolmaǵandardy ustaý jáne bótenniń múlkine zııan keltirgen bozbalanyń ata-anasyna aıyppul salý tártibin jeńildetti. Sherýdi tıisti organdar drondar men tikushaqtar kómegimen baqylap otyrdy, temirjol stantsııalarynda patrýl kúsheıtildi. Bılik sonymen qatar tártipsizdikterge úndeýdiń jańa túrlerin anyqtaý úshin ınternetti jiti qadaǵalap otyr.
dpa aqparat agenttiginiń habarlaýynsha, Mılandaǵy narazylyqtar keshke deıin negizinen beıbit sıpatta ótip, ymyrt jabyla qala ortalyǵynda quqyq qorǵaý organdarymen qaqtyǵystar bolǵan. Polıtsııa narazylardyń bir tobyn taıaqpen uryp toqtatqan. Tártipsizdiktiń odan ári jalǵasýynan qorqyp, brend taýarlar satýshylar óz dúkenderiniń aldynda tosqaýyl qoıyp qorǵap júr.
Bolonıada polıtsııa narazylyq bildirýshiler kolonnasyn temirjol vokzalyna jaqyndatpaý úshin kózden jas aǵyzatyn gaz ben sý shashatyn zeńbirekterdi qoldandy. Týrınde polıtsııa narazylardy qalqanmen yǵystyryp tastaǵan.
Rımde negizinen Palestınany qoldaýshylar kóshege shyqty. Olar qalanyń tarıhı ortalyǵynan sherýletip ótti. Olar, dpa aqparat agenttiginiń habarlaýynsha, Kolızeıge de bir kirip shyqqan. Neapol men Florentsııada da narazylyq aktsııalary ótti.
Buryn Italııa tártipsizdikter men dúkenderdiń jabylýyna baılanysty Mılanǵa ásker jiberýdi qarastyryp jatqanyn habarlanǵanbyz.
Italııa jappaı tártipsizdikke qatysqandar men tonaýshylarǵa jazany kúsheıtpek.
