Italııadaǵy qazba jumystary kezinde ejelgi rım teatry tabyldy

Mamandar ejelgi Rım qalasynyń ornynan jabyq teatr, bazar jáne ózen portynyń qaldyqtaryn tapty. Kembrıdj ýnıversıtetiniń basshylyǵymen júrgizilgen zertteý Italııanyń ortalyǵyndaǵy Interamna Lırenastyń bir kezderi gúldengen qala bolǵanyn kórsetti, dep habarlaıdy Kazinform VVS jańalyqtaryna silteme jasap.

Tabylǵan arheologııalyq qazbalar qalanyń quldyraýy sarapshylar boljaǵan ýaqyttan 300 jyldan keıin bastalǵanyn bildiredi. Qysh buıymdarǵa jasalǵan saraptama Latsıonyń ońtústigindegi qala bizdiń eramyzǵa deıingi ІІІ ǵasyrdyń sońyna deıin quldyraýǵa qarsy turǵanyn kórsetedi.

- Biz buǵan deıin eshkim qazba jumystaryn júrgizip kórmegen jerden bastadyq. Bul jerde eshteńe bolǵan joq, kóne qalanyń izi de baıqalǵan joq, tek synǵan qysh ydystardyń bólshekteri jatty.

Biraq biz bul jerden jaı provıntsııa ǵana emes, 900 jyl boıy ártúrli qıyndyqtarǵa beıimdelgen gúldengen qala ornyn taptyq, - deıdi zertteý avtory doktor Alessandro Laýnaro.

«Interamna Lırenas» jobasynyń basshysy, doktor Laýnaro arheologtar buǵan deıin qalany ólip bara jatqan provıntsııa dep sanaǵanyn aıtty.

Zertteý kezinde ol jerde úlken qoıma, ǵıbadathana jáne monsha kesheni bolǵany anyqtaldy.

Zertteýshiler bul qurylymdar bizdiń dáýirimizge deıingi І ǵasyrdyń aıaǵynan IV ǵasyrǵa deıin ózen portyna qyzmet kórsetkenine senimdi.

Arheologtar komandasy sonymen qatar 1500 adamǵa arnalǵan jabyq teatrdyń qaldyqtaryn tapty. Laýnaro bul qalanyń qýatty, turǵyndardyń ál-aýqaty joǵary bolǵanyn kórsetetinin aıtty.

Alaıda arheologtar qalanyń kúshpen qıratylǵanyn kórsetetin eshqandaı dálel tappady.