Italııadaǵy qazaq rýhy: Qazaqstandyq stýdent Olımpıadada volonter boldy

ASTANA. KAZINFORM — Italııada 5 jyldan beri bilim alyp, Sıena, Bolonıa jáne Mılan ýnıversıtetteriniń dıplomyn ıelengen 21 jastaǵy atyraýlyq Nurhan Orynbasarov búginde sheteldegi qazaq jastarynyń maqtanyshyna aınaldy. 

«Jibek Joly» telearnasynyń «Búgin.Live» baǵdarlamasynda qonaq bolǵan ol Olımpıada oıyndaryndaǵy volonterlik qyzmeti, AKSI stýdentter qaýymdastyǵynyń jumysy jáne jat elde júrip otandyq sportshylarǵa qoldaý kórsetýdiń mańyzy týraly aıtyp berdi.

Atyraý BIL mektebiniń túlegi Nurhan Orynbasarov Italııadaǵy bilim jolyn Foundation baǵdarlamasynan bastap, búginde Mılan ýnıversıtetinde magıstratýrada ekonomıst mamandyǵy boıynsha bilim alyp jatyr.

Nurhan tek sabaqpen shektelmeı, álemdik deńgeıdegi sporttyq sharalardyń ortasynda júr.

Ol Olımpıada oıyndarynda volonter retinde qyzmet etip, álemdik dodanyń ishki tynysyn seziný baqytyna ıe boldy.

— Mundaı olımpıadaǵa volonter retinde qatysyp, Mıhaıl Shaıdorovtyń tarıhı jeńisine kýá bolý men úshin erekshe maqtanysh. Jalpy volonterdiń jumysy óte qarqyndy. Tańerteń turyp, osy sharaǵa kelemiz. Basty mindemiz — qonaqtarǵa baǵyt kórsetý, aqparat berý jáne uıymdastyrý jumystaryna kómektesý, — dep atap ótti keıipkerimiz.

Sonymen qatar Olımpıada oıyndarynan bólek, Nurhan Italııada ótetin kez kelgen qazaqstandyq sportshylar qatysatyn jarystarda trıbýnanyń aldyńǵy shebinen tabylýǵa tyrysady.

— Shetelde júrsek te, qazaq sportshylaryn qoldaýǵa tyrysamyn. Mysaly, Qazaqstan — San-Marıno fýtbol matchyna, sondaı-aq Qaırat — Inter arasyndaǵy oıyndarǵa baryp qatystym. Óz eliniń namysyn qorǵap jatqan sportshylarǵa jankúıer bolý men úshin mańyzdy, — deıdi ol.

Aıta keteıik, búginde Nurhan AKSI (Qazaqstandyq stýdentterdiń Italııadaǵy qaýymdastyǵy) uıymynyń belsendi múshesi. Bul qaýymdastyq — jat jerge endi kelgen stýdentterge baǵyt-baǵdar berip, qazaq jastarynyń basyn qosatyn altyn kópir.

Buǵan deıin, Mılan jáne Lıvıno qalasynda erikti qyzymetin atqaryp júrgen qazaq qyzdary jaıly jazǵan edik.