Italııadaǵy ereýilderge 2 mln-nan astam adam qatysty

ASTANA. KAZINFORM — Djordja Melonı úkimetine Gaza sektoryndaǵy soǵysqa baılanysty Izraılge qarsy qatań pozıtsııany ustanǵany úshin qysym kúsheıýi aıasynda juma kúni Italııanyń birqatar aımaǵynda iri jalpyulttyq narazylyq sharalary ótti, dep habarlaıdy Kazinform menshikti tilshisi. 

Politico basylymynyń málimetinshe,  kásipodaq qaıratkerleri, stýdentter, belsendi toptar men otbasylar Palestına týy men Izraıldi «basqynshylyqty toqtatýǵa» shaqyrǵan plakattar kóterip, eldiń túkpir-túkpirindegi qalalardaǵy tasjoldar men kólik toraptaryn jaýyp tastady. 

Italııanyń eń iri kásipodaq uıymy CGIL málimetinshe, sherýlerge 2 mln-nan astam adam qatysqan.

Beısenbi kúni Izraıl Gazaǵa gýmanıtarlyq kómek jetkizgisi kelgen 41 kemeden turatyn «Jahandyq Sýmýd» flotılııasyn (Global Sumud Flotilla) ustap, 20 ıtalıandyq belsendini ustaǵannan keıin kásipodaqtar jalpy ereýilge shaqyrdy. 

Sherýshiler Italııa úkimeti flotılııa ekıpajdaryn qorǵaý úshin jetkilikti sharalardy qoldana almady dep málimdedi.

Olar úkimetti Izraılmen áskerı baılanystardy úzýge, Palestına memleketin moıyndaýǵa jáne áskerı shyǵyndardy azaıtýǵa úndep otyr. 

Rım Palestına memleketin kepilge alynǵandar bosatylmaıynsha jáne Gaza sektoryndaǵy HAMAS sodyrlary bılikten joıylmaıynsha, moıyndamaıtynyn málimdedi.

Juma kúni narazylyq bildirýshiler Peskara, Trento, Bolonıa, Mılan jáne Týrın qalalaryndaǵy iri tasjoldardaǵy kólik qozǵalysyn jaýyp tastady, sonymen qatar Florentsııa, Genýıa, Perýdja jáne Kalıarıde temirjolǵa shyǵyp, poıyz qozǵalysyn buǵattady. Týrın men Neapolde polıtsııa sherýshilermen qaqtyǵysty.

Kólik, medıtsına qyzmetkerleri men muǵalimder ereýilge shyqty, bul poıyzdardyń toqtaýyna jáne mektepterdiń jabylýyna ákeldi, al stýdentter ýnıversıtetterdi basyp aldy. Lıvornoda dokerler port qaqpalaryn jaýyp, bul toqtap turǵan júk kólikteriniń uzyn-sonar kezegin týdyrdy.

Kólik mınıstri Matteo Salvınıdiń málimdeýinshe, bul ereýil zańsyz jáne ereýilshiler jeke de, kásipodaq músheleri retinde de sanktsııalarǵa tap bolatynyn eskertti.
Dj.Melonı beısenbi kúni bul úzilis palestınalyqtarǵa paıda ákelmeıtinin jáne tek ıtalıandyqtar úshin qıyndyqtar týdyratynyn málimdep, ereýilshilerdi «demalys kúnderin uzaq ótkizgisi keletini» úshin aıyptady.

Rımde sherýshiler protsessııasy polıtsııa tosqaýyl qoıǵan Termını vokzalynan bastaldy. 

— Bul úkimet Gazada bolyp jatqan oqıǵalardy aıyptamaıdy, Ol genotsıdti qoldaý úshin qarý-jaraqpen qamtamasyz etedi, al densaýlyq saqtaý, bilim berý nemese jalaqy úshin aqsha qalmaı otyr, — dedi POLITICO-ǵa Vıchentsadan kelgen 24 jastaǵy narazylyq bildirýshi Klara.

CGIL kásipodaq jetekshisi Maýrıtsıo Landını narazylyq bildirýshiler «álemge yntymaqtastyq pen baýyrlastyq nıettestigin bildirip jatqanyn» aıtyp, «baıypty úkimettiń halyqty tyńdaı alatyn kishipeıildiligi bolýy kerek» dep qosty.

Buǵan deıin AQSh prezıdenti Donald Tramp áleýmettik jelide Gaza sektoryndaǵy bitimgershilik josparyna qatysty beıneúndeýimen bóliskenin jazǵan edik.