Italııadaǵy demografııalyq daǵdarys: bir aýylda 30 jylda alǵash ret náreste dúnıege keldi
ASTANA. KAZINFORM — Italııanyń Abrýtstso aımaǵyndaǵy Palıara-deı-Marsı aýylynda Lara esimdi qyz dúnıege kelgen. Osylaısha, aýyl turǵyndarynyń sany 20-ǵa jetti, dep habarlaıdy BELTA.
Qyzdy shoqyndyrý rásimine jergilikti jurtshylyq túgel qatysty. Sábıdiń dúnıege kelýi erekshe oqıǵa bolǵany sonshalyq, ol BAQ betterinde jarııalandy. Kóp adam bul aýyl týraly osy jańalyq arqyly bildi. Laranyń dúnıege kelýi qýanyshty oqıǵa bolǵanymen, bul Italııanyń demografııalyq daǵdarysyn eske túsirdi.
Istat ulttyq statıstıka agenttiginiń málimetinshe, elde týý kórsetkishi 16 jyl boıy tómendep kelgen. Byltyr kórsetkish 369 944 bolyp, tarıhı mınımýmǵa jetti.
2025 jyldyń alǵashqy 7 aıyndaǵy málimetter týý kórsetkishiniń odan ári tómendegenin kórsetedi. Bul másele Abrýtstso aımaǵynda óte ózekti. Onda týý kórsetkishi 2025 jyldyń qańtarynan shildesine deıin ótken jyldyń sáıkes kezeńimen salystyrǵanda 10,2% azaıǵan.
Palıara-deı-Marsı qalasynyń meri Djýzeppına Perotstsı aımaqtyń halyq sanynyń azaıýynan zardap shegip jatqanyn atap ótti. Munda qarttardyń ornyn basar urpaq joqtyń qasy.
Lara dúnıege kelgennen keıin ata-anasy 1000 evro kóleminde bir rettik tólem aldy. Sondaı-aq olar aıyna shamamen €370 balaǵa beriletin járdemaqy alady. Biraq erli-zaıypty qazirdiń ózinde qyzynyń bilim alýyna alańdap otyr. Sebebi aýyldaǵy sońǵy mektep ondaǵan jyl buryn jabylǵan.
Bıyl qyrkúıek aıynda Grekııada demografııalyq daǵdarysqa baılanysty 721 mektep jabylatyny týraly jazdyq.
Al Ońtústik Koreıa halqynyń sany 2125 jylǵa deıin 7,53 mıllıon adamǵa azaıyp ketýi múmkin.