Italııadaǵy áýejaılardyń birinde janartaý atqylaýyna baılanysty reıster toqtatyldy
ASTANA. KAZINFORM — Italııanyń Sıtsılııa aralyndaǵy Katanııa-Fontanarossa halyqaralyq áýejaıy Etna janartaýynyń qaıta atqylaýyna baılanysty reısterdi qabyldaý men jóneltýdi toqtatty, dep habarlaıdy Euronews.
Basylymnyń málimetinshe, janartaý atqylaýy kezinde kúl shamamen tórt shaqyrym bıiktikke kóterilgen. Kúl bulty men jeldiń qolaısyz baǵytyna baılanysty áýe keńistiginiń jekelegen aımaqtary jabyldy.
Áýejaıdyń jumysy 27 qyrkúıek saǵat 12:00-ge deıin (Astana ýaqytymen 15:00) derlik tolyq toqtatyldy. Jolaýshylarǵa reısteriniń mártebesin aldyn ala tekserip, ushatyny rastalmaǵan jaǵdaıda áýejaı termınalyna kelmeýge keńes berildi.
Kidirister Sıtsılııadaǵy basqa da áýejaılarǵa — Komızo, Palermo jáne Trapanı áýejaılaryna áser etti. Olarǵa ushaqtardyń bir bóligi baǵyttalyp otyr.
Reısterdiń toqtatylýy men keshigýi óńirdegi kólik júıesinde qıyndyqtar týǵyzdy. Euronews málimetinshe, qoǵamdyq uıymdar jekelegen baǵyttar boıynsha áýe bıletteri baǵasynyń kúrt óskenin de habarlaǵan.
Kólik salasyndaǵy kásipodaqtar Etna janartaýynyń jańa atqylaýy jaǵdaıynda turaqty áreket etý josparynyń joqtyǵyn synǵa alyp, óńir bıligin naqty áreket etý tetigin ázirleýge shaqyrdy.
Eske salaıyq, Etna janartaýy atqylap, Sıtsılııadaǵy áýe qatynasyna kedergi keltirgen edi.
