Italııada júrgizýshi mektep avtobýsyn ishindegi balalarmen qosa órtep jiberdi
ASTANA. QazAqparat - Mılannyń tóńireginde júrgizýshi ishinde 50-den astam oqýshy otyrǵan avtobýsty aıdap áketti. Ol sol avtobýspen birneshe polıtsııa kóligin soǵyp ótip, sosyn ishindegi balalarmen qosa órtep jibergen. Oǵan deıin ishtegi keı balalardy baılap tastaǵan, dep habarlaıdy QazAqparat VVS silteme jasap.
Italııa polıtsııasynyń málimetinshe, avtobýsty órter aldynda júrgizýshi balalarǵa «Eshkim tiri qalmaıdy» degen. Alaıda, shyn máninde eshkim ólgen joq, balalar avtobýstyń artqy terezesi arqyly syrtqa shyǵyp úlgerdi. Terezeni avtobýstyń sońynan qýyp jetken polıtseıler syndyrǵan bolatyn.
Polıtsııa málimetinshe, oqıǵa saldarynan 14 adam tútinnen ýlanǵan, degenmen olardyń ómirine qaýip tónip turǵan joq.
«Bul naǵyz ǵajaıyp. Áıtpese bir adam da aman qalmaı, naǵyz tragedııa bolar edi», - dedi Mılannyń bas prokýrory Franchesko Greko.
Júrgizýshi tutqyndaldy. Ol - Senegalda týyp-ósken 47 jastaǵy Italııa azamaty eken. Avtobýsta balalarmen birge bolǵan muǵalimniń sózinshe, júrgizýshi Italııanyń kóshi-qon saıasatyna kóńili tolmaıtynyn birneshe ret aıtqan.
Keı BAQ ókilderi júrgizýshi «Jerorta teńizindegi adam ólimine tosqaýyl qoıýdy» talap etkenin jazdy.
