Italııada júk kóligi júrgizýshileriniń ereýili saldarynan motsarella óndirisi toqtady
ASTANA. KAZINFORM — Italııanyń ońtústiginde júk kóligi júrgizýshileriniń ereýili motsarella irimshigin, makaron ónimderi men qyzanaq tuzdyqtaryn óndirýdiń toqtaýyna ákeldi. Jappaı narazylyq saldarynan janarmaı, azyq-túlik jáne dári-dármek jetkizýde de irkilister týyndady, dep habarlaıdy Reuters.
Ótken aptadan beri júk kóligi júrgizýshileri janarmaı shyǵynyn azaıtý sharalaryn qabyldaýdy talap etip, joldar men avtomagıstraldardy jaýyp jatyr. Eldiń ońtústik aımaqtarynda, sonyń ishinde Kampanııa, Sıtsılııa jáne Kalabrııa óńirlerinde jetkizý jumystary aıtarlyqtaı buzylǵan.
Atap aıtqanda, logıstıkalyq tizbekterdiń úzilýine baılanysty býıvol sútinen motsarella óndiretin kásiporyndar jumysyn ýaqytsha toqtatýǵa májbúr boldy. Mundaı kásiporyndardyń basym bóligi Kampanııa óńirinde ornalasqan.
Azyq-túlik óndirýshiler de zardap shekti. La Doria kompanııasynyń basshysy Antonıo Ferraıolı Italııanyń ońtústigindegi kásiporynnyń jeti zaýyty jumysyn toqtatyp, qyzmetkerleriniń jartysyn májbúrli demalysqa jibergenin habarlady.
«Eger narazylyq jalǵasa berse, Italııanyń ońtústiginde óndirilgen ónimder búkil eldegi sýpermarketterdiń sórelerinen joǵalady. Olardyń ornyna ımporttyq taýarlar nemese Italııanyń basqa óńirlerinde óndirilgen ónimder qoıylady», – dep eskertti ol.
Ereýil avtomobıl ónerkásibine de áser etti. Qosalqy bólshekterdiń jetispeýine baılanysty Stellantis kontserni Neapol mańyndaǵy Pomılıano-d'Arko, Abrýtstso óńirindegi Atessa jáne Bazılıkata óńirindegi Melfı qalalarynda ornalasqan zaýyttarynyń jumysyn toqtatty.
Sýpermarketterdi, janarmaı quıý stantsııalary men aýrýhanalardy qamtamasyz etýde de eleýli qıyndyqtar baıqaldy. Neapolde janarmaı tapshylyǵy medıtsınalyq qyzmetterdiń jumysyna kedergi keltirip, turmystyq qaldyqtardy shyǵarýǵa qaýip tóndirdi.
Narazylyqtar aıasynda premer-mınıstr Djordja Melonı bastaǵan úkimet 22 qazanda kólik salasyn qosymsha qoldaý sharalaryn maquldady.
Bılik júk tasymaldaýshylarǵa salyqtyq jeńildikter berý úshin qosymsha 106 mln eýro (shamamen 53,4 mlrd teńge) bóldi. Buǵan deıin osy maqsatqa 434 mln eýro (shamamen 218,7 mlrd teńge) qarastyrylǵan bolatyn. Sonymen qatar fermerlerdi qoldaýǵa 60 mln eýro (shamamen 30,2 mlrd teńge), al balyq sharýashylyǵyna 10 mln eýro (shamamen 5 mlrd teńge) baǵyttalady.
Úkimetpen júrgizilgen kelissózderden keıin tasymaldaýshylar ókilderi Sıtsılııadaǵy joldardy bógeýdi toqtatatynyn málimdedi. Kalabrııada da narazylyq aktsııalary ýaqytsha toqtatyldy. Al Kampanııada jol qozǵalysyna qoıylǵan shekteýler birtindep alynady dep kútilýde.
Premer-mınıstr Djordja Melonı kelissózge kelip, narazylyqty toqtatýǵa kelisken tasymaldaýshylar uıymdaryna alǵys bildirdi.
Sonymen birge úkimet azyq-túlik, dári-dármek jáne basqa da birinshi kezekte qajetti taýarlardyń úzdiksiz jetkizilýin qamtamasyz etýge nıetti. Joldyń jabylǵan ýchaskeleri arqyly ótýge tyrysqan júk kólikterine polıtsııanyń ilesip júrýi qarastyrylǵan.
Buǵan deıin Italııa jappaı tártipsizdikter men tonaýǵa qatysqandarǵa jazany kúsheıtip jatqany habarlanǵan bolatyn.
Aıta ketelik Italııada janarmaı baǵasyna qarsy narazylyq azyq-túlik jetkizilimine kedergi keltirgeni týraly jazǵan edik.
