Italııada jeke kollektsııadaǵy Renýar, Sezann jáne Matıss týyndylary urlandy
ASTANA. KAZINFORM – Italııanyń Mamıano-dı-Traversetolo qalasyndaǵy Vılla Manıanıdan birneshe mıllıon eýroǵa baǵalanatyn óner týyndylary sanaýly mınýt ishinde urlandy, dep habarlaıdy La Repubblica basylymy.
Urlyq Lýıdjı Manıanıdiń jeke kollektsııasy saqtalǵan Vılla Manıanı ǵımaratynda bolǵan. Qaskóıler kireberis esikti buzyp, ishke zańsyz kirgen.
Urlanǵan týyndylardyń qatarynda Per Ogıýst Renýardyń «Balyqtar» kartınasy, Pol Sezannnyń «Shıe qosylǵan natıýrmort» atty sýreti jáne Anrı Matısstiń «Terrasadaǵy hanym» akvareli bar. Sonymen qatar qylmyskerler qashý kezinde taǵy bir kartınany tastap ketkeni habarlandy.
Manıanı qorynyń basqarýyndaǵy bul kollektsııaǵa Tıtsıan, Albreht Dıýrer, Pıter Paýl Rýbens, Fransısko Goııa, Antonıo Kanova jáne Klod Mone sekildi áıgili sheberlerdiń týyndylary engen. Ol Italııadaǵy eń mańyzdy jeke kórkemóner kollektsııalarynyń biri sanalady.
Eske sala keteıik, ótken jyly Lývr mýzeıindegi tonaý Frantsııany dúr silkindirgen edi — birneshe mınýt ishinde qylmyskerler Napoleon men ımperatrıtsa Jozefınanyń zergerlik buıymdaryn alyp ketken. Bul sońǵy jyldardaǵy eń shýly qylmystardyń biri boldy.
Sol oqıǵada tórt belgisiz adam ataqty mýzeıdiń Apollon galereıasyndaǵy eki vıtrınadan jalpy quny 88 mln eýroǵa baǵalanatyn segiz baǵaly áshekeıdi urlap ketken.
Aıta keteıik, aqpar aıynda Parıjde Janna d’Ark músininiń qylyshy urlandy.
Al Belgııada Napoleonnyń júzigi qoldy boldy.
