Italııada jarylys qaýpine baılanysty 300 mektep evakýatsııalandy
ASTANA. KAZINFORM — Italııada jarylys jasaıtyny týraly jappaı elektrondy hattar taratylǵannan keıin keminde 300 mekteptiń oqýshylary men qyzmetkerleri qaýipsiz jerge kóshirildi. Bılik habarlamalardy jalǵan dep boljap otyr. Polıtsııa tergeý jumystaryn bastady. Bul týraly BBC jazdy.
Basylymnyń habarlaýynsha, 11 qarasha, sársenbi kúni Italııanyń júzdegen mektebine jarylys qaýpi týraly birdeı mazmundaǵy habarlamalar kelgen.
Italııanyń bilim mınıstri Djýzeppe Valdıtara La7 telearnasynyń efırinde bul qoqan-loqqylardyń jalǵan bolýy múmkin ekenin málimdedi. Sonymen qatar ol osyndaı habarlamalar alǵan mektepter sany áli de artýy múmkin ekenin joqqa shyǵarmady.
Mınıstrdiń aıtýynsha, habarlamalardyń jappaı taratylýy olardyń shynaıylyǵyna kúmán keltiredi.
Rım polıtsııasy oqıǵaǵa qatysty tergeý bastady.
— Elimiz boıynsha jarııalanǵan jarylys qaýpine baılanysty dabylǵa oraı, barlyq oqýshy qaýipsiz jerge evakýatsııalanǵanyn jáne pedagogterdiń baqylaýynda ekenin habarlaımyz, — delingen Rım mektepteriniń biriniń ata-analarǵa joldaǵan habarlamasynda.
Reuters agenttiginiń málimetinshe, jarylys qaýpi týraly elektrondy hatqa «Mıhaıl Andropov, Mızogınıstan vılaıatynyń jetekshisi» degen qoltańba qoıylǵan. Dál osyndaı qoltańba 6 qarashada Irlandııa men Bolgarııadaǵy buqaralyq aqparat quraldarynyń redaktsııalaryna joldanǵan qoqan-loqqy hattarynda da bolǵan.
Bul oqıǵa ótken aptada Eýropada túrli nysandarǵa jarylǵysh zat qoıylǵany týraly habarlamalar tolqyny taraǵan tusta boldy. Qoqan-loqqylar sýpermarketterge, qan bankterine, áýe qozǵalysyn basqarý júıelerine jáne telekompanııalarǵa qatysty túsken.
Dúısenbiden bastap ondaǵan áýe reısine de jarylys qaýpi týraly habarlamalar jiberilgen. Sonyń saldarynan keıbir ushaqtar baǵytyn ózgertip, basqa áýejaılarǵa qonýǵa májbúr boldy. Birqatar elde áýe kemelerin alyp júrý úshin joıǵysh ushaqtar áýege kóterildi.
6 qarasha, juma kúni Ryanair, Wizz Air, KLM jáne basqa da áýe kompanııalarynyń Eýropanyń túrli qalalaryna baǵyt alǵan reısterine qatysty qaýip týraly habarlamalar túsken.
Ushaqtar qonǵannan keıin mamandar olardy tekserdi. Birde-bir áýe kemesinen qaýipti zat tabylǵan joq.
Ótken aptanyń sońyna qaraı Eýropalyq buqaralyq aqparat quraldarynyń redaktsııalaryna da jarylǵysh zat qoıylǵany týraly habarlamalar kelip tústi.
Buǵan deıin Italııada jappaı tártipsizdikterge qatysý jáne tonaýshylyq úshin jazany qatańdatý josparlanyp otyrǵany habarlanǵan bolatyn.