Italııada janarmaı baǵasyna qarsy narazylyq azyq-túlik jetkizilimine kedergi keltirdi
ASTANA. KAZINFORM — Italııanyń Іshki ister mınıstrligi janarmaı baǵasynyń qymbattaýyna baılanysty joldardy jaýyp, zańsyz narazylyq aktsııalaryna qatysqan adamdardy tekserýdi bastady, dep jazady Report.
Júk kóligi júrgizýshilerine qatysty tekserýler negizinen eldiń ońtústigindegi Kampanııa aımaǵynda júrgizilip jatyr.
Corriere della Sera basylymnyń málimetinshe, quqyq qorǵaý organdaryna júk kólikteri jınalǵan oryndardan bastap olardy jol boıy alyp júrý tapsyrylǵan. Іshki ister mınıstrligi narazylyqqa qylmystyq toptardyń qatysy bolýy múmkin ekenin de joqqa shyǵarmaıdy.
Eldiń ońtústik óńirlerinde, sonyń ishinde Neapol men Sıtsılııada ereýilderge baılanysty sýpermarketterde azyq-túlik tapshylyǵy baıqalady. Keıbir janarmaı quıý beketterinde otyn taýsylǵan.
Neapol men Barı bıligi qoqys shyǵarýda da irkilister bar ekenin habarlady. Osy qalalardyń áýejaılaryn qosa alǵanda, ońtústiktegi birqatar áýejaıda avıatsııalyq kerosın tapshylyǵy týyndaǵan. Buǵan qosa, Neapolde qoǵamdyq kólik jumysy da buzylýy múmkin ekeni eskertildi. 2008 jyly Neapolde bolǵan qoqys daǵdarysy Romano Prodıdiń úkimeti qulaýyna áser etken faktorlardyń biri boldy.
Buǵan deıin salalyq birlestikter Italııa úkimeti janarmaı baǵasynyń ósýine baılanysty shyǵyndardy óteý úshin 500 mıllıon eýroǵa deıin qarjy bóletinine kepildik bergennen keıin joldardy bógeýdi toqtatýǵa shaqyrǵan. Alaıda júk tasymalymen aınalysatyn keıbir toptar, sonyń ishinde Sıtsılııadaǵy tasymaldaýshylar ereýildi jalǵastyrý týraly sheshim qabyldaǵan.
Italııa premer-mınıstri Djordja Melonı kólik kompanııalary men aýyl sharýashylyǵy óndirýshilerine qosymsha qoldaý kórsetý týraly dekret qabyldaý úshin úkimettiń kezekten tys otyrysyn shuǵyl shaqyrdy.
