Italııada Vezývıı ulttyq saıabaǵy órtendi: jalyn Neapolden kórinip tur
ASTANA. KAZINFORM — Italııanyń Kampanııa óńirindegi Vezývıı ulttyq saıabaǵynda iri orman órti bastalyp, jalynnyń bıiktigi sonshalyq — ony Neapol qalasynyń ózinen de kórýge bolady. Bul týraly Euronews habarlaıdy.
Órtpen kúresýge 100-den astam órt sóndirýshi men eriktiler tartylǵan. Jaǵdaı óte kúrdeli kúıde qalyp otyr. Azamattyq qorǵanys qyzmeti armııany joldardy kúzetýge, órtke qarsy tehnıkalardyń qozǵalysyn qamtamasyz etýge jáne sý tasıtyn kólikterdi jetkizýge jumyldyrdy.
Sóndirý jumystaryna tańsáriden bastap túrli óńirlerden kelgen alty órt sóndirý ushaǵy atsalysyp jatyr. Sonymen qatar, óńirlik áýe qyzmetteri de iske qosylǵan.
Órtpen kúresýshiler aptap ystyq pen qolaısyz aýa raıyna qaramastan, túngi ýaqytta da jalyndy aýyzdyqtaýǵa tyrysty.
Tórt kúnnen beri jalǵasyp jatqan órt Tertsıno eldi mekenindegi qaraǵaıly ormannan bastalyp, Ottavıano men San-Djýzeppe-Vezývıano mýnıtsıpalıtetterine taralǵan. Tilsiz jaýdyń aýqymy sonshalyq — ol búkil Neapol jáne mańaıynan anyq baıqalady.
Tertsıno qalasynyń meri Franchesko Ranerı ótken túndi «asa qaýipti» dep sıpattady. Onyń aıtýynsha, qutqarýshylardyń tynymsyz eńbeginiń arqasynda turǵyn úılerdi aman alyp qalý múmkin bolǵan, alaıda tabıǵı sulýlyǵymen tanymal keıbir aımaqtar tolyǵymen joıylǵan.
Órttiń shyǵý sebebi kúdik týdyryp otyr. Tertsıno meri 2017 jylǵy uqsas oqıǵalardy eske salyp, bul joly da órttiń qasaqana uıymdastyrylǵan bolýy múmkin ekenin aıtty.
Qazirgi tańda ot Tertsıno mańyndaǵy qaraǵaıly ormannan Tırone-Alto-Vezývıo qoryǵyna qaraı jyljyp barady. Bul jaǵdaı qutqarý qyzmetterin erekshe alańdatyp jatyr. Saıabaq ákimshiliginiń málimetinshe, zardap shekken aýmaq kólemi shamamen 200 gektardy quraıdy.
Kampanııa óńirindegi orman órtteri — aýqymdy problema. Óńirlik azamattyq qorǵanys qyzmeti bir mezgilde Salerno provıntsııasyndaǵy Merkato-San-Severıno men Benevento provıntsııasyndaǵy Frasso-Telezıno eldi mekenderinde de órt sóndirý jumystaryn júrgizip jatyr. Juma kúni Kampanııa óńirinde 50-den astam órt tirkelip, aımaqtaǵy jaǵdaıdyń kúrdeliligin kórsetti.
Osydan buryn Katalonııadaǵy ash qursaq eshkiler Ispanııadaǵy orman órtimen kúresýge kómektese bastaǵany málim boldy.