Italııada Valerıı Tolmachev esimdi azamattyń qamaýǵa alynýyna baılanysty barlyq jaǵdaılar anyqtalýda - SІM
ASTANA. 25 sáýir. QazAqparat /Rýslan Ǵabbasov/ - Parıj-Rım baǵytyndaǵy ushaqty basyp almaq bolǵan azamattyń kim ekendigin anyqtaý erteńge deıin múmkin bolmaıdy, dedi búgin Syrtqy ister mınıstrliginde ótken aptalyq brıfıngte atalǵan vedomstvonyń resmı ókili Asqar Abdrahmanov.
«Italııada Valerıı Tolmachev esimdi azamattyń qamaýǵa alynýyna baılanysty barlyq jaǵdaılar anyqtalýda. Búginde Italııada Pasha merekesi - demalys. Sondyqtan da osy eldiń memlekettik qurylymdarynda tek kezekshiler jumys isteıdi. Osyǵan baılanysty biz qazirgi ýaqytta Rımdegi QR Elshiligi arqyly bolǵan oqıǵanyń jaı-japsaryn anyqtaýdamyz»,-dedi resmı ókil.
Buqaralyq aqparat quraldarynda taratylǵan málimetke qaraǵanda, Valerıı Tolmachev esimdi azamat Qazaqstan tólqujatymen Parıj-Rım baǵytyndaǵy ushaqta bolǵan. Rım áýejaıy polıtsııasynyń málimeti boıynsha, atalǵan azamat alaburtqan kúıde tyrnaq egeıtin quralmen ushaq stıýardessasyn qorqytyp, ushaqtyń Lıvııaǵa burylýyn talap etken.
A. Ábdirahmanovtyń sózine qaraǵanda, atalǵan azamattyń tulǵasyn anyqtaý maqsatynda qazirgi kezde Rımdegi QR Elshiligi osy azamatpen baılanys ornatýǵa tyrysýda. Ol qazir Rımnen 80 shaqyrym qaladaǵy tergeý -oqshaýlaý orynyna qamalǵan. «Alaıda, Italııada búgin demalys bolǵandyqtan, ázirge onymen baılanys ornatýǵa jáne atalǵan azamattyń tulǵasyn naqty anyqtaýǵa erteńge deıin múmkin bolmaı tur»,-dedi resmı ókil.
Ushaqtaǵy kýágerlerdiń málimetine qaraǵanda, bul azamat alkogoldik ishimdikke mas bolmaǵan.
Aıta keteıik, V. Tolmachev esimdi azamat Qazaqstan Respýblıkasynyń ıÝNESKO janyndaǵy turaqty ókildiginde keńesshi qyzmetin atqarady. Alaıda, qamaýǵa alynǵan azamatpen baılanys ornatylmaǵandyqtan, V. Tolmachevtiń osy oqıǵaǵa qatysy bar ekendigin naqtylaý múmkin bolmaı tur.
