Italııada tutqyndalǵan ırandyq kásipker bosatyldy
ASTANA. KAZINFORM – AQSh orderimen Italııada ustalǵan ırandyq kásipker Mohammad Abedını jeksenbi kúni túrmeden bosatylyp, Iranǵa oraldy. Bul týraly Kazinform agenttiginiń menshikti tilshisi habarlady.
Ótken aıda 38 jastaǵy ırandyq kásipker Mohammad Abedını AQSh bıliginiń ótinishi boıynsha ırandyq áskerılerdi ushqyshsyz basqarylatyn navıgatsııalyq bólshekterdi jetkizip, AQSh-tyń sanktsııalyq zańdaryn buzdy degen aıyppen Amerıka bıliginiń suraýymen Mılan áýejaıynda ustaldy.
Amerıka quqyq qorǵaý organdarynyń málimetinshe, bul quramdas bólikter keıinnen qańtar aıynda ushqyshsyz basqarylatyn apparattyń Iordanııanyń Sırııamen shekaralas jerdegi áskerı bazaǵa soqqy jasaý kezinde paıdalanylyp, amerıkalyq úsh áskerıdiń qaza tabýyna ákeldi. Iran bul soqqyǵa qatysy baryn joqqa shyǵardy.
Bostandyq úshin bostandyq
Italıandyq BAQ onyń isin Abedını tutqyndalýynan keıin úsh kún ótken soń Tegeranda ustalǵan ІІ Foglio kúndelikti gazetiniń tilshisi Sesılııa Salanyń tutqyndalý isimen baılanystyrdy. Italııa SІM Iran Elshisin shaqyrtyp alyp, ustalǵan tilshini bosatýdy talap etti. Keıin ol túrmeden shyǵarylyp, Italııaǵa oraldy.
Iran ıtalıandyq tilshi túrmege Rımge Abedınıdi bosatýǵa qysym jasaý úshin qamaldy degen aıyptardy joqqa shyǵaryp otyr.
Irannyń sot organdarynyń málimdeýinshe, túsinispeýshilik saldarynan tutqyndalǵan Abedını Italııada qamaýdan Iran Syrtqy ister mınıstrliginiń talpynystary men eki eldiń barlaý qyzmetteri arasyndaǵy kelissózderdiń arqasynda bosatylǵan.
Iran sot organdarynyń habarlaýynsha, túsinispeýshilik joıylyp, Abedını túrmeden bosatyldy, dep habarlaıdy IRNA.
Iran SІM baspasóz hatshysy Esmaıl Bagaı men Irannyń Mizan aqparat agenttigi Abedınıdiń jeksenbi kúni Iranǵa kelgenin rastady.
Rım ekstradıtsııaǵa qarsy
Irandyq kásipkerdiń jeksenbi kúni bosatylýy Italııanyń ádilet mınıstri Karlo Nordıo Mılan apellıatsııalyq sotyna ótinish bergennen keıin boldy.
Buǵan deıin BAQ-ta ırandyq kásipkerdi AQSh-qa ekstradıtsııalaý múmkindigi talqylanǵan bolatyn. Alaıda Italııanyń Ádilet mınıstri Qurama Shtattar ırandyqty ekstradıtsııalaý týraly resmı ótinish jasamaǵanyn málimdedi.
Italııanyń Ádilet mınıstrliginiń málimdemesinde Abedınıdi ekstradıtsııalaýdyń zańdy sharttary joq ekenini, óıtkeni bul Italııada da, Amerıka Qurama Shtattarynda da jazalanatyn qylmystar úshin ǵana múmkin bolatyny aıtylǵan.
Málimdemede AQSh-tyń Tótenshe ekonomıkalyq ókilettikter týraly halyqaralyq zańynyń buzylýy ıtalıandyq zań boıynsha qylmys dep tanylǵan áreketterge sáıkes kelmeıtini atap ótildi. Sondaı-aq ırandyq kásipker lańkestik uıymdy qoldady degen basqa aıyptaýlardy rastaıtyn eshqandaı dálel joq ekeni atap ótildi.
Italıandyq jáne halyqaralyq aqparat quraldarynyń habarlaýynsha, Sesılııa Salanyń bosatylýy Italııa premer-mınıstri Djordja Melonı AQSh-tyń jańadan saılanǵan prezıdenti Donald Trampqa Florıdadaǵy Mar-a-Lagodaǵy úıine barǵannan keıin kóp uzamaı bolǵan. Italııa AQSh-tan Salanyń Italııaǵa tez oralýy úshin Abedınıdi ekstradıtsııalaýdan bas tartýda yntymaqtastyq jasaýyn surady.
Italııa elshisi Qazaqstan týraly kitap jazyp jatqanyn jazǵan bolatynbyz.