Italııada túrmelerdiń syıymdylyǵy 15 myń orynǵa ulǵaıtylady

ASTANA. KAZINFORM — Italııada túrmelerdiń tolyp ketý problemasyn sheshý úshin olardyń syıymdylyǵy 15 myń orynǵa arttyrylady, dep habarlaıdy AZERTADJ.

World Prison Brief derekqorynyń málimeti boıynsha, Italııada túrmelerdegi tutqyndar sany oryn sanyna qaraǵanda 133%-ǵa deıin asyp, Eýropadaǵy eń joǵary kórsetkishterdiń biri retinde tirkelgen.

Osyǵan baılanysty Italııa úkimeti uzaq jyldar boıy sheshimin tappaǵan qamaý oryndarynyń tolyp ketý máselesin sheshý úshin olardyń syıymdylyǵyn 15 myń orynǵa arttyrýdy jáne esirtkige táýeldi jazasyn óteýshilerdi emdeý ortalyqtaryna aýystyrýdy kózdep otyr.

Tutqyndardyń jaǵdaıy Italııada erekshe nazar aýdardy. Ótken jyly óz-ózine qol jumsaý oqıǵalary rekordtyq deńgeıge jetti. Sonymen qatar, jazasyn óteýshiler kúzet oryndarynda aýa temperatýrasynyń óte joǵary bolýyna jáne kondıtsıonerdiń joqtyǵyna kóp shaǵymdanǵan.

Ádilet mınıstrliginiń málimeti boıynsha, 15 shildedegi jaǵdaı boıynsha Italııada 62 986 adam qamaýda otyr. Al túrmelerdiń tıimdi syıymdylyǵy 47 289 adamǵa teń. Osylaısha, Italııadaǵy qamaý oryndarynyń tolyp ketý deńgeıi shamamen 133%-dy quraıdy, bul Eýropadaǵy eń nashar kórsetkishterdiń biri sanalady.

World Prison Brief derekqorynyń málimeti boıynsha, Italııamen qosa Kıpr men Frantsııada da jaǵdaı nasharlaý.

Ótken jyly Italııa parlamenti qamaý oryndarynyń jaǵdaıyn jaqsartý týraly zańdy maquldaǵanymen, onyń praktıkalyq nátıjesi az boldy.

Italııa úkimeti 2027 jylǵa deıin túrme syıymdylyǵyn shamamen 10 myń orynǵa keńeıtý maqsatynda 758 mıllıon eýro somasyndaǵy josparyn usyndy. Sonymen qatar, bes jyl ishinde qosymsha 5 myń oryn qurýǵa arnalǵan jeke bastama da bar. Alaıda, bul jobaǵa bıýdjettik qarjylandyrý bólinbegen.

Buǵan deıin habarlanǵandaı, BUU málimetinshe, COVID-19 pandemııasy kezinde qysqa merzimdi tómendeýden keıin álem boıynsha túrmelerde otyrǵan adamdar sany qaıta kóbeıip jatyr.