Italııada týrıstik avtobýs ózenge qulap ketti
ASTANA. KAZINFORM – Týrındegi (Italııa) Pıatstsa Vıttorıo Veneto mańynda týrıstik avtobýs Po ózenine qulady. Kólik qorshaýdy buzyp, ózenge qulap, jartylaı sýǵa batqan. Avtobýs júrgýzishisi mert boldy, dep jazady La Republica basylymy.
Avtobýsta tek júrgizýshi ǵana bolǵan, ony es-tússiz kúıde qutqaryp alǵan. Dárigerlerdiń kómegine qaramastan ol qaıtys bolǵan. Oqıǵa ornyna qutqarýshylar tikushaq ekıpajymen kelgen. Jol apaty kezinde basqa jolaýshylar nemese jaıaý júrginshiler zardap shekken bolýy múmkin degen boljam boıynsha izdeý júrgizildi, biraq eshkim tabylmady.
Oqys oqıǵa qalanyń tarıhı ortalyǵyna jaqyn ornalasqan Mýratstsı aýdanynda bolǵan. Kampobassodaǵy Di Carlo Tour jeke kompanııasyna tıesili avtobýs keri baǵytta kele jatyp apatqa ushyraǵan.
Júrgizýshi 63 jastaǵy Nıkola Dı Karlo basqa baǵytpen júrip ketken nemese ózin nashar sezingendikten artqa qaraı áreket etken degen boljam bar. Qozǵalys kezinde avtobýs úsh áıeldi qaǵyp ketken, biraq olar aýyr jaraqat almaǵan, jábirlengender jaǵdaıyn baqylaý úshin aýrýhanaǵa jetkizilgen.
— Qyzmettik tergeý bastaldy. Qazir bul ispen Týrın qalalyq polıtsııasy aınalysyp jatyr. Órt sóndirýshiler avtobýsty sýdan shyǵara salysymen ol tárkilenip, tehnıkalyq saraptama bastalady. Eń aldymen tejeý júıesi tekseriledi. Odan ári júrgizýshiniń ólim sebebi anyqtalady, - delingen habarda.
Aıta keteıik, buǵan deıin Aqmola oblysynda avtobýs pen jeńil kólik soqtyǵysqanyn jazǵan edik.