Italııada týrısterge arnalǵan at-arbalarǵa tyıym salynýy múmkin
ASTANA. KAZINFORM — Italııa Parlamentiniń depýtattar palatasynda zań jobasy tanystyryldy. Qujat maquldanǵan jaǵdaıda týrıstik qalalarda, ásirese Rımde keń taralǵan «bottıchelle» dep atalatyn at jegilgen arbalarǵa tyıym salynady, dep habarlaıdy Euronews.
Basylymnyń málimetinshe, Rımdegi eń kóne kásipterdiń biri birjola joıylyp ketýi múmkin.
Demokratııalyq partııa, AVS jáne «Bes juldyz qozǵalysy» usynǵan zań jobasy Jol qozǵalysy kodeksiniń 70-babyn joıýdy kózdeıdi. Atalǵan bap «janýar kúshimen júretin kólik quraldarymen jolaýshy tasymaldaý qyzmetin» rettep, olardyń joldarda júrýine is júzinde ruqsat beredi.
Bastamanyń maqsaty — jolaýshy tasymaldaý, tapsyryspen qoǵamdyq kólik qyzmetin kórsetý, sondaı-aq týrıstik, oıyn-saýyq jáne saltanatty maqsattarda kólik quraldaryn súıretý úshin janýarlardy paıdalanýǵa tikeleı tyıym salý.
— Botticelle arbalarynyń jumys ýaqytyn jáne qyzmetin shekteıtin jekelegen mýnıtsıpaldyq qaýlylar jetkiliksiz. Bizge qalalarda botticelle men janýar jegilgen arbalardy paıdalanýǵa tolyqtaı tyıym salatyn ulttyq norma qajet, — dedi Demokratııalyq partııanyń depýtaty, Italııa astanasynda janýarlardy qorǵaý máselesine jaýapty Patrıtsııa Prestıpıno.
Ol bul týraly AVS depýtaty Franchesko Emılıo Borrellı jáne «Bes juldyz qozǵalysynyń» depýtaty Serdjo Kostamen birge ótken baspasóz máslıhatynda málimdedi.
Depýtattyń aıtýynsha, Amore A Quattro Zampe uıymyn qosa alǵanda, ekologııalyq uıymdar birneshe jyldan beri qazirgi qala kósheleri janýarlardyń ál-aýqatyn qamtamasyz etýge qolaısyz ekenin aıtyp keledi. Sonymen qatar sońǵy kúnderdegi aptap ystyq janýarlardyń qatty qyzǵan asfaltpen júrýi múmkin emes etedi.
Tamyz aıy boıy Rımniń negizgi týrıstik aýdandarynda «Jaıaý júrgen — jaqsy» atty aqparattyq naýqan ótedi. Ony Rım-astana keńesshisi, sondaı-aq Rım aglomeratsııasynyń qorshaǵan orta, ekologııalyq kóshý, erekshe qorǵalatyn tabıǵı aýmaqtar jáne janýarlardy qorǵaý máseleleri jónindegi keńesshisi Rokko Ferraro bastamashylyq etken. Naýqan ıtalıan jáne aǵylshyn tilderinde daıyndalǵan.
Ferraro da zań jobasyn qoldap, parlament bul tarıhı múmkindikti paıdalanyp, qalalarda týrısterdi tasymaldaý úshin attardy paıdalanýǵa birjola núkte qoıatyn normany qabyldaıdy degen úmitin bildirdi.
— 2026 jyly astananyń qaq ortasynda týrısterdi at jegilgen arbamen tasymaldaýdy jalǵastyrý — bolashaqtyń emes, ótkenniń tájirıbesi, — dedi ol.
Buǵan deıin Italııadaǵy jaǵajaıda keıbir demalýshylarǵa qolshatyr ornatýǵa tyıym salynatyny týraly jazǵan bolatynbyz.
