Italııada týrıster jaǵajaıdyń qumyn tasyp áketip jatyr
ASTANA. QazAqparat - Italııada Sardınııa aralynyń bıligi týrısterdiń kádesyı retinde tasyp áketýinen qaýiptenip, Jerorta teńizi araldaryndaǵy áıgili jaǵajaılardy qorǵaýǵa kiristi, dep habarlaıdy Bı-Bı-Sı agenttigi.
Jazǵy demalys maýsymyna oraı araldaǵy bılik zań qabyldap, qum, tas jáne ulý qabyrshyqtaryn áketýge talpynǵan tórt quqyqbuzýshyǵa 1 000 eýro kóleminde aıyppul tóletti. Jergilikti turǵyndardyń kóp jylǵy shaǵymynan keıin keden de áýejaıdaǵy júk salǵyshtardy qatań baqylap, jaryq túsire otyryp, baǵaly tabıǵı kapıtaldardy izdeýge kiristi.
1994 jyly bılik Sardınııanyń soltústik shyǵysynda ornalasqan áıgili qyzǵylt qumdy Býddelı aralyndaǵy jaǵajaıǵa kirýge tyıym saldy.
2015 jyldyń jazǵy úsh aıynda ǵana Sardınııadaǵy tek bir áýejaıdyń ózinde keden qyzmetkerleri bes tonna jaǵajaı qumyn tárkiledi, dep jazady jergilikti basylymdar.
Osyǵan narazy aral turǵyndary sheneýnikterden mundaı kádesyı jınaýdy qylmys dep tanyp, shara qoldanýyn talap etken.
Jurtshylyqtyń aryz-shaǵymynan keıin zań qabyldanyp, barlyq túrdegi - aq, sary, usaq jáne iri kvartsty qumdardyń tasymaldanýyna 500-den 3000 eýroǵa deıin aıyppul tóleý jazasy engizildi.
«Sardınııa araldarynda aıryqsha tústi qumnyń paıda bolýyna mıllıondaǵan jyldar ketken. Al, munda jyl saıyn keletin mıllıondaǵan týrıster tabıǵattyń tamasha bólshegin bir-bir qutydan estelikke áketetin bolsa, túk qalmaýy múmkin», dep dabyl qaǵady jergilikti tabıǵat qorǵaýshylary.
